14 сакавіка, Мінск /Настасся Лямешчанка - БЕЛТА/. Выстаўка-атракцыён па матывах творчасці ветэрана беларускай анімацыі, мастака і рэжысёра Алы Мацюшэўскай адкрыецца 15 сакавіка ў малой выставачнай зале Палаца Радзівілаў у Нясвіжы. Аб гэтым паведамілі БЕЛТА ва ўстанове культуры.
На выстаўцы прадставяць аўтарскія эскізы Алы Мацюшэўскай, якія сталі асновай і вобразамі герояў 20 мультфільмаў Нацыянальнай кінастудыі "Беларусьфільм".
"Майстэрства Мацюшэўскай надае нашай анімацыі дыханне высокай візуальнай культуры і нясе ў сабе выразнае пачуццё стылю. Звышзадачай усіх элементаў арыгінальна аформленага выставачнага праекта "Час - хуткая рака..." з'яўляецца знаёмства наведвальнікаў з багатым і шматгранным светам мастачкі", - адзначылі арганізатары.
Госці экспазіцыі змогуць наведаць выстаўку аптычных ілюзій, якія створаны па вобразах персанажаў Алы Мацюшэўскай. Акрамя таго, будуць працаваць фотазоны і тэматычныя інсталяцыі. Прадметную экспазіцыю дапоўніць экранная рэтраспектыва лепшых мультфільмаў беларускай мастачкі.
Работы Алы Мацюшэўскай можна ўбачыць па 30 красавіка.-0-
