ДЗЯРЖОРГАНЫДЗЯРЖОРГАНЫ
Флаг Пятніца, 1 ліпеня 2022
Мінск Малавоблачна +19°C
Усе навіны
Усе навіны
Культура
12 мая 2022, 11:25

Восем юных цымбалістаў з Шуміліна сталі лаўрэатамі міжнароднага анлайн-фестывалю

Фота з архіва
Фота з архіва

12 мая, Віцебск /Алеся Пушнякова - БЕЛТА/. Восем выхаванцаў Шумілінскай дзіцячай школы мастацтваў (ДШМ) сталі лаўрэатамі міжнароднага фестывалю "Мы выбіраем мір" (Масква), які праходзіў у анлайн-фармаце. Аб гэтым карэспандэнту БЕЛТА паведамілі ва ўстанове культуры.

Юныя музыканты з Шуміліна, якія валодаюць спрадвечна беларускім інструментам, спаборнічалі з талентамі з Расіі, Сербіі, Грузіі, Егіпта, Перу, Вялікабрытаніі і іншых краін. Толькі беларускіх устаноў адукацыі і творчых калектываў на фестывалі было прадстаўлена больш за 30, таму выхаванцам Шумілінскай ДШМ давялося праявіцца на ўсе сто. Некаторыя з іх дэбютавалі ў гэтым конкурсе і ўвайшлі ў лік прызёраў. Прыгажосць гучання цымбалаў у суправаджэнні акампанементу фартэпіяна ў выкананні педагога ДШМ Таццяны Гутаравай настолькі пакарылі журы, што ў выніку ў шумілінцаў у скарбонцы ўзнагарод - два дыпломы першай ступені, пяць музыкантаў заваявалі другія месцы і аднаму выканаўцу дасталася бронза.

Улада Халсціннікава і Сцяпан Голубеў, якія сталі лепшымі ў сваіх намінацыях, не першы год навучаюцца ігры на цымбалах. Абодва акрамя музыкі прысвячаюць сябе іншым творчым напрамкам. Сцяпан займаецца харэаграфіяй, наведвае гістарычны гурток, у вольны час выпальвае па дрэве і складвае фігуркі арыгамі. Пры гэтым 14-гадовы школьнік паказвае высокія вынікі ў вучобе і паспявае гуляць на камп'ютары. На яго сцяне асабістай славы красуюцца дыпломы розных вартасцей з многіх творчых конкурсаў. Сямікласніца Улада таксама захапляецца танцамі, старанна вучыцца ў школе, а яшчэ з'яўляецца прыкладам для малодшых братоў. Яна расце ў шматдзетнай сям'і, лічыцца галоўнай мамінай памочніцай і яркім творчым праменьчыкам з добрым сэрцам. Сваю любоў яна дорыць і блізкім людзям, і жывёлам.

Сярэбраныя ўзнагароды ў конкурсе атрымалі Каця і Таня Лукач, Эліна Пушнякова, Ганна Рабцава і Маша Шыёнак. А самая юная ўдзельніца першакласніца Лена Асташонак заваявала дыплом лаўрэата трэцяй ступені. Дзяўчынкі ахвотна адгукнуліся на прапанову паўдзельнічаць у фестывалі і старанна працавалі над праграмай для яго.

Шумілінская школа цымбалаў лічыцца адной з моцных у вобласці. Педагогі Алена і Вольга Скорынавы разам з бацькамі сваіх выхаванцаў дапамагаюць дзецям дабіцца высокага майстэрства ў музыцы. А Вольга Скорынава сама ўдзельнічала ў гэтым жа фестывалі, паказваючы прыклад вучням, і ў сваёй узроставай катэгорыі таксама стала першай. Маладому настаўніку музыкі акампаніравала яе малодшая сястра Марыя.

Арганізатары конкурсу адзначылі не толькі адточаную тэхніку выканання шумілінскіх цымбалістаў, але і іх любоў да радзімы, яе багатай культурнай традыцыі, а таксама іх упартасць і працавітасць, дзякуючы якім хлопчыкі і дзяўчынкі дабіліся высокага ўзроўню ў валоданні музычным інструментам.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі