14 лютага, Віцебск /Алеся Пушнякова - БЕЛТА/. Артыстка Віцебскай абласной філармоніі Джуліета Тарахчан 14 лютага на святочным канцэрце прадставіць сольную праграму "Усё пра каханне". Аб гэтым карэспандэнту БЕЛТА паведамілі ва ўстанове культуры.
Джуліета Тарахчан паўстане перад віцебскім гледачом у крыху новым для яе амплуа. Прывычныя для яе джазавыя і блюзавыя кампазіцыі зменяць эстрадныя хіты расійскіх, беларускіх і замежных выканаўцаў.
"На гэты раз пройдзе лайтовы і душэўны сольнік, на якім я выканаю песні Святланы Лабады, Ані Лорак, Аляксея Чумакова, Алены Ваенгі, Наталлі Арэйра, Джо Кокера, Гэры Мура і іншых зорак эстрады. Разам са мной на сцэну выйдуць артысты філармоніі Валерый Бруйко і Алена Паўлянкова. Пастараемся парадаваць нашых паклоннікаў. Напрыклад, з Валерыем у дуэце мы выканаем шлягеры Анжалікі Варум і Леаніда Агуціна. Мае калегі таксама прадставяць вядомыя песні зорак айчыннай і расійскай эстрады, напрыклад, Руслана Аляхно і Паліны Гагарынай. І ўсё ж я не змагу абысціся без джаза і блюза, сёе-тое з прывычнага рэпертуару прагучыць у праграме "Усё пра каханне". Мне хочацца, каб слухачы атрымалі задавальненне ад канцэрта, акунуліся ў атмасферу рамантыкі, цеплыні, душэўнасці", - расказала Джуліета Тарахчан.
Артыстка сёлета адзначыць 15-годдзе творчай дзейнасці ў абласной філармоніі. У лістападзе пройдзе яе юбілейны канцэрт, дзе яна прадставіць самыя вядомыя кампазіцыі з рэпертуару Лары Фабіян, Уітні Х'юстан, Мэраі Кэры, а таксама выканае любімыя джазавыя і блюзавыя хіты.-0-
