28 сакавіка, Мінск /Кар. БЕЛТА/. У Мастацкай галерэі Міхаіла Савіцкага 29 сакавіка адкрыецца выстава жывапісу члена Беларускага саюза мастакоў Уладзіміра Гладкова "Паміж небам і зямлёй", прысвечаная Дню яднання народаў Беларусі і Расіі, паведамілі БЕЛТА ў Музеі гісторыі горада Мінска.
У экспазіцыю ўвайшло больш за 50 твораў жывапісу, якія раскрываюць гістарычны ўклад жыцця, самабытнасць і нацыянальныя традыцыі народаў Беларусі, Расіі, Узбекістана, Туркменістана, Кыргызстана, Таджыкістана, Грэцыі, Турцыі, Кітая, Афганістана. Аўтар у сваіх работах удзяляе ўвагу дэталям нацыянальнага касцюма, упрыгажэнням, традыцыйным заняткам і промыслам.
У серыі гарадскіх пейзажаў паказана манументальная прыгажосць архітэктурных помнікаў Ніжняга Ноўгарада, Кастрамы, Самарканда, Бухары, Стамбула, Венецыі, Лейпцыга, Амстэрдама і іншых гарадоў. Дапаўняюць прыгажосць і ўнікальнасць тых краін, дзе пабываў мастак, пейзажы гор, пустынь, рэк, азёр і мораў.
На выставе будуць прадстаўлены творы розных гадоў: жанравыя, пейзажныя кампазіцыі, партрэты. Мастак раскрыў свой свет праз рэалістычную і адначасова лірычную перадачу любімых месцаў і прадметаў. Пільную ўвагу ён удзяліў стварэнню цэласнай колеравай гармоніі, што вызначае яго творы. Свет паказаны ў вельмі тонкіх лірычных перажываннях і драматычных калізіях, якія кранаюць глыбінёй і выразнасцю.
Выстава будзе працаваць да 30 красавіка.
Уладзімір Іванавіч Гладкоў нарадзіўся 12 мая 1947 года ў горадзе Дашхавуз (Туркменістан). У 1976 годзе скончыў графічны факультэт Ташкенцкага педагагічнага інстытута. З 2002 года жыве і працуе ў Мінску. З'яўляецца членам Беларускага саюза мастакоў, Міжнароднага саюза дызайнераў. Працуе ў жывапісе, графіцы, займаецца праектаваннем музейных экспазіцый.-0-
