19 сакавіка, Мінск /Кар. БЕЛТА/. Выстава "Парцаляванае натхненне", прысвечаная творчасці мастака Леаніда Багданава, адкрылася сёння ў Нацыянальным мастацкім музеі, паведамілі БЕЛТА ва ўстанове культуры.
Экспазіцыя стала ажыццяўленнем шматгадовай мары майстра аб персанальнай выставе ў Нацыянальным мастацкім музеі. Тут прадстаўлены работы з калекцыі сям'і мастака, са сбору НММ. Многія з іх экспануюцца ўпершыню.
У 1962 годзе Леанід Багданаў пачаў працаваць на Мінскім фарфоравым заводзе. Тады ж на прадпрыемстве склаўся калектыў мастакоў-спецыялістаў і адкрылася эксперыментальна-мастацкая лабараторыя, дзе вырашаліся складаныя задачы вытворчасці фарфору. Уласных глыбокіх традыцый у гэтым відзе мастацтва Беларусь не мела. Сакрэты фарфоравага майстэрства на Мінскім заводзе асвойваліся паступова пры рабоце над узорамі чайнага і сталовага посуду масавай вытворчасці.
Леаніду Багданаву ўдалося ў надзвычай насычаным заводскім рытме выпуску масавай прадукцыі ствараць цікавыя аўтарскія творы. "Ён любіў працаваць з формай. Форма - пачатак парцаляванага прадмета. Мастак імкнуўся знайсці сваю выразную пластычную мову ў яе канструяванні. Ён аддаў перавагу складаным формам, часта дапоўненым рэльефам. Крыніцай ідэй па стварэнні формы, колеравага і фактурнага рашэння твораў для мастака была прырода. Леанід Багданаў у сваіх творах імкнецца гарманічна злучыць багатыя формы і арыгінальны дэкор. Узоры яго паўсядзённага чайнага посуду ўспрымаюцца як сапраўдныя творы мастацтва", - расказалі арганізатары.
Леанід Багданаў - адзін з мастакоў, які ў другой палове ХХ стагоддзя стаяў ля вытокаў стварэння новага віду беларускага дэкаратыўна-прыкладнога мастацтва - мастацкага фарфору.
Убачыць работы майстра можна па 26 красавіка.-0-
