ДЗЯРЖОРГАНЫДЗЯРЖОРГАНЫ
Флаг Нядзеля, 25 верасня 2022
Мінск Малавоблачна +11°C
Усе навіны
Усе навіны
Культура
21 снежня 2021, 09:31

У музеі народнай творчасці "Бездзежскі фартушок" адродзяць традыцыю лозапляцення

21 снежня, Брэст /Кар. БЕЛТА/. У Драгічынскім раёне ў музеі народнай творчасці "Бездзежскі фартушок" адродзяць традыцыю лозапляцення, паведаміла карэспандэнту БЕЛТА малодшы навуковы супрацоўнік музея Людміла Янушчык.

Ініцыятыву "Незабытае рамяство" рэалізуюць у рамках праекта міжнароднай тэхнічнай дапамогі "Ландшафтна-арыентаванае развіццё сельскіх тэрыторый даліны ракі Ясельда пры ўдзеле мясцовага насельніцтва". "Раней лозапляценне ў нас было шырока прадстаўлена. Кожны гаспадар умеў плесці нейкія вырабы. Цяпер гэта рамяство трохі забыта. На базе музея хочам адрадзіць тэхнікі лозапляцення. Адзін з партнёраў - Бездзежская школа, адпаведна, свае ўменні майстры будуць перадаваць і дзецям. Дзякуючы гэтаму майстэрства не знікне, а атрымае другое жыццё", - упэўнена Людміла Янушчык.

Майстэрню размесцяць у будынку фондасховішча музея. Памяшканні адрамантуюць за кошт уласных сродкаў, а грант прыцягнуць для аснашчэння інвентаром і мэбляй. Лазу, згодна з умовамі ініцыятывы, будуць нарыхтоўваць у заказніку "Спораўскі". Для яе перавозкі набудуць трактар ​​з прычэпам.

Для правядзення майстар-класаў плануецца запрашаць майстроў з суседніх вёсак, якія валодаюць тэхнікай лозапляцення, уласцівай для гэтага рэгіёна. Яны будуць паказваць, як плесці кошыкі, вазы для кветак, сувенірныя шкатулкі. На тэрыторыі музея на дзесяці сотках высадзяць рады лаванды. Гэтыя духмяныя кветкі будуць выкарыстоўваць для дэкарыравання плеценых вырабаў.

Намечаныя работы завершаць да наступнай восені. Агульная сума ініцыятывы складае больш за 13,3 тыс. еўра. З іх 17 працэнтаў накіруюць з мясцовага бюджэту і ўласных сродкаў музея народнай творчасці. "Для нас ініцыятыва - штуршок для адраджэння традыцыі. Плануем, што і пасля завяршэння праекта майстэрня прадоўжыць працаваць. Цяпер у свеце павышаная цікавасць да этна- і экастылю. Спадзяёмся, што гэта тэндэнцыя будзе дыктаваць устойлівы попыт і на лозапляценне", - дадала субяседніца.

Праект "Ландшафтна-арыентаванае развіццё сельскіх тэрыторый даліны ракі Ясельда пры ўдзеле мясцовага насельніцтва" фінансуецца Еўрапейскім саюзам і рэалізуецца Бярозаўскім райвыканкамам у партнёрстве з Мясцовым фондам развіцця сельскіх тэрыторый, Мясцовым экалагічным фондам "Заказнікі Брэсцкай вобласці" і ДПУ "Рэспубліканскі біялагічны заказнік "Спораўскі".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі