15 чэрвеня, Мінск /Кар. БЕЛТА/. У Мінску адкрыўся інтэрактыўны музей музыкі, дзе можна і трэба дакранацца да экспанатаў і іграць на іх, паведамляе БЕЛТА.
Музейная прастора падзелена на некалькі тэматычных зон: аркестрарый, антыкварый, эксперыментарый, рэлаксарый, бібліятэка, мюзік- і арт-холы. У кожнай можна азнаёміцца з рознымі музычнымі інструментамі і іх гісторыяй.
У мюзік-холе знаходзяцца самыя вялікія аб'екты: антыкварны раяль 1915 года, сучасная кельцкая арфа і клавесін. "Тут у нас будуць праходзіць рэлакс-вечары музыкатэрапіі, а таксама разнастайныя праграмы для дзяцей па азнаямленні са светам класічнай музыкі. На майстар-класах ім раскажуць пра інструменты вядомыя музыканты", - паведаміла дырэктар і стваральнік музея Марыя Бандарэнка. Ёсць і праграмы для дарослых - з музычнымі вечарамі, лекцыямі і майстар-класамі.
У музеі праводзяць экскурсіі і квесты. У экспазіцыі можна знайсці калекцыі статуэтак, так ці інакш звязаных з яе тэматыкай. Напрыклад, у арт-холе ёсць музыканты - алімпійскія мішкі.
Інструменты размешчаны па групах: духавыя, ударныя і г.д. Ёсць і дзіўныя экспанаты. Напрыклад, бамбукавы ксілафон з В'етнама, егіпецкі бубен са скуры жырафы.
У эксперыментарыі можна даведацца, ад чаго залежыць вышыня гуку, якія інструменты можна зрабіць з падручных сродкаў і шмат іншага. У антыкварыі ёсць незвычайны аналаг гітары - сітар, а таксама піянерскія горн і барабан, вінтажная дзіцячая цытра, гуслі "перапёлачка".
У аркестрарыі аснову экспазіцыі складаюць аркестравыя інструменты: скрыпка, альт, віяланчэль, кантрабас - адсюль і назва залы. Ёсць тут і электронны арган.
Паводле слоў Марыі Бандарэнка, ідэя стварыць музей прыйшла да яе спантанна. У яе сям'і многія захапляюцца музыкай. "Неяк да мяне прыязджалі маленькія пляменнікі, я праводзіла для іх заняткі. Мы слухалі Баха, Вівальдзі, Моцарта. Дала дзецям у рукі музычныя інструменты і ўбачыла рэакцыю, якую немагчыма апісаць", - успамінае дырэктар. Яна выказала надзею, што ў музеі будзе цікава і дзецям, і дарослым, якія змогуць здзейсніць сваю мару - паспрабаваць іграць на інструменце.-0-
