11 верасня, Мінск /Кар. БЕЛТА/. Выставачны праект пра жыццё Янкі Купалы ў Татарстане адкрыецца ў Дзяржаўным літаратурным музеі Янкі Купалы, паведаміла журналістам дырэктар установы Ганна Галінская.
Адкрыццё выставачнага праекта адбудзецца ў час Дзён культуры Рэспублікі Татарстан у Беларусі. Генеральны дырэктар Нацыянальнага музея Рэспублікі Татарстан Аліса Вяткіна адзначыла, што прадметы, звязаныя з Беларуссю, займаюць у іх музеі асаблівае месца. "У нашага музея 14 філіялаў у Татарстане, і адзін з філіялаў – гэта музей Янкі Купалы ў вёсцы Пячышчы. Мы прывезлі ў Беларусь стэндавую выставу, дзе хочам паказаць гісторыю жыцця Янкі Купалы ў перыяд эвакуацыі. Музей быў адкрыты ў 1975 годзе, і ўвесь гэты час вядзецца цеснае ўзаемадзеянне з беларускім бокам, праводзіцца шмат сумесных выставачных праектаў. Загадчык музея кожны год прыязджае ў Беларусь, а беларускія калегі - да нас. Вядома, у нашым календары падзей адзначаны дзень нараджэння і дзень памяці Янкі Купалы. Мы вельмі даражым і беражом спадчыну, якая ў нас засталася. У мінулым годзе ў час Дзён культуры Рэспублікі Беларусь у Татарстане пры ўдзеле міністраў культуры была адкрыта мемарыяльная дошка. Цяпер жыхары вёскі і горада прыязджаюць туды і аддаюць даніну памяці вялікаму беларускаму паэту", - расказала Аліса Вяткіна.
Яна дадала, што ўжо больш за 30 гадоў пры Нацыянальным музеі Рэспублікі Татарстан працуе клуб ваеннай рэканструкцыі "Віцязь", удзельнікі якога актыўна ўдзельнічаюць у праектах па рэканструкцыі, што праводзяцца ў Брэсцкай крэпасці. Паводле яе слоў, у час Дзён культуры будуць падпісаны пагадненні паміж Нацыянальным музеем Рэспублікі Татарстан і Нацыянальным мастацкім музеем, а таксама Беларускім дзяржаўным музеем гісторыі Вялікай Айчыннай вайны.
"Мы супрацоўнічаем з дырэктарам Нацыянальнага гістарычнага музея Беларусі Аляксандрам Храмым і хочам вывесці нашы адносіны на новы ўзровень і афіцыйна замацаваць іх на паперы. Вельмі спадзяёмся ў наступным годзе прывезці ў Беларусь выставу, якая будзе расказваць пра гісторыю і традыцыі татарскага народа", - расказала Аліса Вяткіна.
Паводле яе слоў, такая выстава праходзіла ўжо ў Беларусі. У 2018 годзе Елабужскі дзяржаўны музей-запаведнік аб'ехаў практычна ўсе вялікія гарады нашай краіны з выставай "Шматколернасць татарскай нацыянальнай культуры", а на тэрыторыі Елабугі штогод праходзіць арт-рэзідэнцыя маладых мастакоў BASHNYA, у ёй прымаюць актыўны ўдзел беларускія мастакі-пачаткоўцы.
Ганна Галінская адзначыла, што музей вялікага паэта ў вёсцы Пячышчы - гэта адзіны музей імя Янкі Купалы за межамі Беларусі. "Варта падзякаваць цёплай татарскай зямлі, якая прыняла стомленага паэта ў сябе ў вёсцы Пячышчы. У свой час дырэктар мукамольнага завода прапанаваў яго сям'і два невялікія пакоі, у якіх яны жылі. Вядома, з дапамогай выставы, якая прыехала да нас, мы хочам перадаць тую атмасферу мінулага. Гэта наш сумесны праект. Сімвалічна, што жыхары Рэспублікі Татарстан убачылі яго яшчэ 1 красавіка на ўрачыстым мерапрыемстве, прысвечаным Дню яднання Расіі і Беларусі", - расказала дырэктар Дзяржаўнага літаратурнага музея Янкі Купалы.
Выставачны праект адкрыецца 12 верасня ў 14.30. Там будуць прадстаўлены як фотадакументальныя матэрыялы, так і мемарыяльныя прадметы Янкі Купалы і пераклады яго санетаў на татарскую мову.-0-
