19 красавіка, Гомель /Кар. БЕЛТА/. У Гомелі Палац культуры "Фестывальны" даў старт фотапраекту "Сіняя хустачка", паведамілі БЕЛТА арганізатары.
Гэта тэма, прысвечаная Дню Перамогі, мае асаблівы сэнс і гучанне. "З ваеннага ліхалецця песня "Сіняя хустачка" ў выкананні Клаўдзіі Шульжэнка асацыіруецца з той няпростай эпохай і подзвігам савецкага народа. Менавіта тады сіняя хустачка стала сімвалам мірнага блакітнага неба", - расказалі арганізатары.
Далучыцца да фотапраекта можа кожны жадаючы. Дастаткова выканаць тры простыя ўмовы: зрабіць фатаграфію з галоўным атрыбутам, размясціць яе ў альбоме групы ПК "Фестывальны" "УКантакце" і адзначыць хэштэг #СинийПлаточек.
Конкурсныя фатаграфіі будуць прадстаўлены на плошчы Леніна ў Гомелі ў Дзень Перамогі.
Арганізатары фотапраекта хочуць прыцягнуць увагу маладых людзей і прадстаўнікоў старэйшага пакалення да захавання гістарычнай памяці аб укладзе жанчын у перамогу ў Вялікай Айчыннай вайне і ўмацаванне міру.-0-
