ДЗЯРЖОРГАНЫДЗЯРЖОРГАНЫ
Серада, 19 лютага 2020
Мінск Суцэльная воблачнасць +4°C
Усе навіны
Усе навіны
Культура
17 студзеня 2020, 18:18

Трагікамедыю "Асенняя гісторыя" паставілі ў Брэсцкім драмтэатры

17 студзеня, Брэст /Кар. БЕЛТА/. У Брэсцкім акадэмічным тэатры драмы сёння адбыўся перадпрэм'ерны паказ спектакля "Асенняя гісторыя" паводле п'есы класіка італьянскай драматургіі Альда Нікалаі "Жалезны клас", перадае карэспандэнт БЕЛТА.

Спектакль для Малой сцэны паставіў заслужаны дзеяч мастацтваў Беларусі Аляксандр Козак. Жанр пастаноўкі рэжысёр вызначыў як трагікамедыю. Спектакль мае ўзроставае абмежаванне "16+", пры гэтым яго можна рэкамендаваць для сямейнага прагляду. Напісаная больш як паўстагоддзя таму п'еса ніколькі не страціла сваёй актуальнасці, хутчэй, наадварот - у век высокіх скорасцей і тэхналогій стала яшчэ больш сучаснай. Гэта кранальная п'еса, у якой іншасказальнай, тэатральнай мовай гаворыцца аб вечнасці, адзіноце і скарацечнасці чалавечага жыцця.

У аснове сюжэта смешная і адначасова сумная гісторыя выпадковага знаёмства ў скверы на лаўках трох далёка не маладых людзей: два старыя - Луіджы Палья (артыст Мікалай Маршын), Лібера Бока (заслужаны артыст Беларусі Міхаіл Мятліцкі) і "дзяўчына гадоў сямідзесяці" (заслужаная артыстка Беларусі Тамара Ляўчук). У іх няспешных размовах вырысоўваюцца характары, супрацьлеглыя погляды на жыццё, палітыку. У адным яны падобныя - яшчэ зусім нядаўна былі маладыя і поўныя энергіі, а цяпер кожнага дома чакае адзінокая старасць і абыякавасць уласных дзяцей і ўнукаў, прыкрытая знешнім дабрабытам. Адзін у адным яны знаходзяць жаданых слухачоў і субяседнікаў, разам яны спрабуюць вярнуць страчанае юнацтва.

Рэжысёр-пастаноўшчык не замоўчвае аб тым, што спектакль ставіўся пад іх. На думку рэжысёра, спектакль адрасаваны не столькі старэйшаму пакаленню, колькі маладым людзям - іх сынам, дочкам, унукам. "У жыцці ўсё перасякаецца: гумар - са слёзамі, радасць - з журбой. Кожны глядач будзе нешта сваё тут шукаць. Але я хацеў бы, каб людзі адносіліся адзін да аднаго лепш. Усё ж такі жыццё такое кароткае, імгненнае і хочацца больш дабраты. Таму што, на жаль, у нашым свеце год ад году дабрыня, любоў, іншыя станоўчыя якасці адыходзяць на другі план", - падзяліўся патаемным Аляксандр Козак.

На перадпрэм'ерны паказ былі запрошаны аматары тэатра, прадстаўнікі інтэлігенцыі, прэса. Публіка цёпла прыняла новую пастаноўку БАТД. Хочацца пажадаць ёй доўгага і шчаслівага лёсу. Прэм'ера "Асенняй гісторыі" адбудзецца 19 студзеня ў 19.00.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі