8 чэрвеня, Гомель /Кар. БЕЛТА/. Цыкл лекцый "Мастацтва традыцыйнае і сучаснае" арганізуюць у палацы Румянцавых і Паскевічаў творчая майстэрня "Паветра" і музей Гомельскага палацава-паркавага ансамбля, паведамілі БЕЛТА ў дзяржаўнай гісторыка-культурнай установе.
"Праект прызначаны азнаёміць наведвальнікаў з дыялектыкай новага і традыцыйнага ў гісторыі візуальных мастацтваў", - расказалі арганізатары. Ён уключае чатыры лекцыі з прэзентацыямі.
Так, 12 чэрвеня размова пойдзе пра традыцыйны жывапіс і скульптуру ў сучасным мастацтве. "Жывапіс і скульптура з бронзы або мармуру - тэхнікі, якія з'яўляюцца традыцыйнымі. І спачатку здавалася, што сучаснае мастацтва з яго багаццем новых форм (такіх як перформанс, інсталяцыя, рэдзі-мэйд, відэа-арт, нет-арт і г.д.) ніколі не звернецца да класічных відаў для выражэння актуальных тэм. Аднак аказалася, што гэта не так", - адзначылі ва ўстанове.
Традыцыйным жанрам і сюжэтам у сучасным мастацтве будзе прысвечана сустрэча 19 чэрвеня. Партрэт, нацюрморт, пейзаж, ню - жанры, знаёмыя і шануемыя ў традыцыйным мастацтве. Як яны трансфармаваліся ў сучасным? Чаму мноства сюжэтаў з гісторыі па-ранейшаму знаходзяць сваё ўвасабленне ў творах мастакоў? Адказы на гэтыя і іншыя пытанні будуць шукаць на другой лекцыі.
"Сёння немагчыма ўявіць сабе вялікі горад без музея сучаснага мастацтва, - звярнулі ўвагу ў палацы. - Аднак ёсць пэўны ўзаемны інтарэс класічнага музея і мастакоў, якія працуюць з новымі формамі. У выніку ў сценах традыцыйных музеяў рэалізуюць арт-праекты, якія даюць магчымасць сучасным мастакам уступіць у непасрэдны дыялог з шэдэўрамі жывапісу, графікі і скульптуры майстроў мінулага". Падобныя праекты спараджае новае прачытанне класікі, насычаючы яе новымі сэнсамі, а таксама дае магчымасць па-іншаму зірнуць на музейную прастору. Такія прыклады абмяркуюць 26 чэрвеня на лекцыі "Сучаснае мастацтва і класічны музей".
Арганізатары падкрэслілі, што для мастацтва характэрна імкненне да новага праз пераасэнсаванне старога. Таму яно развіваецца, часта адмаўляючы традыцыйныя базавыя асновы. "Лёс любога напрамку - стаць на сучасным этапе новым якасным вітком развіцця, новай традыцыяй і затым быць адхіленым наступнымі пакаленнямі творцаў. Рамантызм, імпрэсіянізм, кубізм, сюррэалізм, канцэптуалізм, рэалізм і многія іншыя стылі і напрамкі - сведчанне таго", - канстатавалі прадстаўнікі палацава-паркавага ансамбля. Падрабязна гэту тэму разгледзяць 3 ліпеня на завяршальнай лекцыі "Традыцыя адмаўлення традыцыі ў мастацтве".
Усе мерапрыемствы пройдуць у выставачнай зале палаца Румянцавых і Паскевічаў. Пачатак у 19.00. Разбірацца ў тэмах удзельнікі будуць з мастацтвазнаўцам Кірылам Сідаравым. Білеты можна набыць у цэнтральнай частцы палаца.
Арганізатары дадалі, што лекцыі правядуць з захаваннем санітарных і проціэпідэміялагічных патрабаванняў.-0-
