24 лістапада, Мінск /Кар. БЕЛТА/. Тэатр эстрады прадаўжае ўдзел у рэспубліканскіх акцыях "Майстры мастацтваў - працаўнікам вёскі" і "Майстры мастацтваў - дзецям", паведаміў карэспандэнту БЕЛТА дырэктар тэатра Сяргей Мядзведзеў.
"Мінулыя выхадныя выдаліся найбольш насычанымі, паколькі артысты тэатра наведалі адразу некалькі мясцін. Мы пабывалі ў Нацыянальным дзіцячым адукацыйна-аздараўленчым цэнтры "Зубраня", дзе выступілі групы "PROвакацыя" і ByCity, а таксама ў Стаўбцоўскім раёне, куды прывезлі праграмы для дарослых і дзяцей з удзелам артыстаў Тэатра эстрады Алены Грышанавай, Шыра, Кацярыны Мядзведзевай, Кацярыны Шумскай, Аляксандра Саванца і нашых сяброў - шоу-тэатра "Хвілінка". Гэта ўжо не першы выезд тэатра ў гарады Беларусі, і заўсёды нас прымаюць цёпла, з задавальненнем бяруць аўтографы, даведваюцца аб дзейнасці тэатра і творчасці артыстаў. Такія паездкі натхняюць станавіцца яшчэ лепшымі, рабіць больш добрых праграм, прадстаўляць нашых артыстаў і іх творчасць у самых розных месцах краіны", - адзначыў Сяргей Мядзведзеў.
Наперадзе ў Тэатра эстрады яшчэ шмат выездаў і нагод для сустрэч са сваімі паклоннікамі: артыстаў у бліжэйшы час чакаюць у Смілавічах і аграгарадку Сеніца.
На мінскай сцэне таксама прадаўжаюцца цікавыя і яркія праграмы. 24 лістапада тут пакажуць эстрадны мюзікл "Бурлеск", 2 снежня - музычны праект "Гараж". 9 снежня на сцэну тэатра вяртаецца пасля невялікага перапынку мюзікл-прытча "Ты і я". У навагодняй афішы шмат святочных праграм і прэм'ер для дзяцей, аб якіх падрабязней можна даведацца на сайце тэатра.-0-
