15 лютага, Гродна /Кар. БЕЛТА/. Таленавітых маладых выканаўцаў з раёнаў Гродзенскай вобласці аб'яднае конкурс народнага вакальна-харавога жанру "Ляці, наша песня!", паведамілі карэспандэнту БЕЛТА ў Гродзенскім дзяржаўным музычным каледжы.
Гродзенскі музычны каледж 3-і раз стане пляцоўкай для конкурсу, які аб'ядноўвае таленавітую і творчую моладзь з усёй вобласці. Удзельнікі прадставяць свае раёны ў адкрытым абласным конкурсе народнага вакальна-харавога жанру "Ляці, наша песня!". Лепшых вызначаць у трох узроставых катэгорыях і 4 намінацыях - "Харавы калектыў", "Фальклорны ансамбль", "Салісты-вакалісты" і "Дуэты".
"Дарэчы, самаму юнаму ўдзельніку нядаўна споўнілася 6 гадоў. Конкурс з году ў год становіцца ўсё больш папулярным. На гэты раз пададзена больш за 30 заявак, а агульная колькасць удзельнікаў складзе амаль 130 чалавек", - расказалі ў Гродзенскім дзяржаўным музычным каледжы.
Конкурс праводзіцца для падтрымкі адораных дзяцей і моладзі, развіцця іх творчых здольнасцей. Таксама сярод яго мэт папулярызацыя народнай творчасці, захаванне і прымнажэнне народных пеўчых традыцый і прапаганда культурнай беларускай спадчыны. Арганізатарамі конкурсу выступаюць упраўленне культуры Гродзенскага аблвыканкама і Гродзенскі дзяржаўны музычны каледж.-0-
