18 красавіка, Цвярская вобласць /Эдуард Півавар - БЕЛТА/. Сустрэчу музейшчыкаў Беларусі і Расіі плануецца правесці летам на Міжнародным фестывалі мастацтваў "Славянскі базар у Віцебску". Аб гэтым паведаміў журналістам дзяржаўны сакратар Саюзнай дзяржавы Рыгор Рапота, перадае карэспандэнт БЕЛТА.
Ідэю такой сустрэчы прапанаваў генеральны дырэктар Нацыянальнага мастацкага музея Беларусі Уладзімір Пракапцоў. У ёй плануецца ўдзел кіраўнікоў як вядучых беларускіх і расійскіх музеяў, так і рэгіянальных. На гэтай сустрэчы музейшчыкі змогуць абмеркаваць не толькі агульныя актуальныя праблемы, але і дамовіцца аб абмене выставамі, стварэнні сумесных экспазіцый. Сустрэчу музейных работнікаў намечана арганізаваць у сядзібе Ільі Рэпіна "Здраўнёва" ў Дзень Саюзнай дзяржавы на "Славянскім базары ў Віцебску".
Размова беларускіх і расійскіх журналістаў з Рыгорам Рапотам адбылася ў Цвярской вобласці ў час экспертна-медыйнага туру "Дача "Чайка" мастака Вітольда Бялыніцкага-Бірулі", арганізаванага Пастаянным камітэтам Саюзнай дзяржавы і міжнародным інфармацыйным агенцтвам "Расія сёння". На дачы "Чайка" адбыўся круглы стол "Бялыніцкі-Біруля - агульны культурна-гістарычны феномен двух народаў", у якім прынялі ўдзел дзяржаўны сакратар Саюзнай дзяржавы Рыгор Рапота, генеральны дырэктар Нацыянальнага мастацкага музея Беларусі Уладзімір Пракапцоў, беларускія і расійскія музейныя работнікі.-0-