14 верасня, Мінск /Кар. БЕЛТА/. Беларускія бібліятэкі прадаўжаюць праходзіць складаны, але важны працэс трансфармацыі. Аб гэтым заявіў журналістам у час прэс-канферэнцыі "Аб развіцці бібліятэчнай справы ў Рэспубліцы Беларусь" намеснік дырэктара Нацыянальнай бібліятэкі Аляксандр Суша, перадае карэспандэнт БЕЛТА.
"У сувязі са змяненнем інфармацыйных працэсаў у грамадстве бібліятэкі прадаўжаюць праходзіць складаны, але важны працэс трансфармацыі. У краіне дзейнічае звыш 7 тыс. бібліятэк, яны прысутнічаюць фактычна ва ўсіх ведамствах дзяржаўнага кіравання краіны. На пачатак бягучага года ў сістэме Міністэрства культуры налічвалася 2524 бібліятэкі. Акрамя таго, бібліятэчны фонд краіны ўключае каля 180 млн фізічных дакументаў, а фонд Нацыянальнай бібліятэкі - звыш 10 млн", - расказаў Аляксандр Суша.
Паводле яго слоў, фіксуюцца новыя тэндэнцыі ў развіцці бібліятэчнай сістэмы, адна з якіх - пераход у віртуальную прастору. На прыкладзе Нацыянальнай бібліятэкі адзначаецца, што яе чытачы, як і раней, прадаўжаюць прыходзіць ва ўстанову. Аднак штогадова расце колькасць віртуальных наведванняў - на сённяшні дзень гэта звыш 70 працэнтаў. "Акрамя таго, увесь свет мае магчымасць далучыцца да сабраных намі інфармацыйных рэсурсаў, у сувязі з чым расшыраецца геаграфія: у ліку нашых карыстальнікаў жыхары Зімбабвэ, Куала-Лумпура, Танзаніі", - адзначыў Аляксандр Суша.
"У бібліятэцы значна развіўся спектр інфармацыйных паслуг і рэсурсаў, якія прадастаўляюцца беларускаму чытачу. Закупляюцца базы даных буйнейшых распрацоўшчыкаў і агрэгатаў з усяго свету, адкрываюцца новыя рэсурсы ў анлайн-доступе, таксама палепшылася сфера віртуальнага кансультавання. Для любога жадаючага даступна асноўная навуковая перыёдыка, публікацыі, дысертацыі і іншыя дакументы з усяго свету", - падкрэсліў намеснік дырэктара Нацыянальнай бібліятэкі.-0-