ДЗЯРЖОРГАНЫДЗЯРЖОРГАНЫ
Флаг Аўторак, 11 мая 2021
Мінск Ясна +12°C
Усе навіны
Усе навіны
Культура
16 лютага 2021, 09:00

"Служыць дабру": пейзажы і партрэты Мікалая Валынца пакажуць на выставе ў Мінску

Фота з архіва
Фота з архіва

16 лютага, Мінск /Кар. БЕЛТА/. Выстава жывапісу "Служыць дабру" вядомага беларускага мастака, члена Беларускага саюза мастакоў, ветэрана Вялікай Айчыннай вайны Мікалая Валынца да 100-годдзя з дня яго нараджэння адкрыецца 25 лютага ў мастацкай галерэі Міхаіла Савіцкага. Аб гэтым БЕЛТА паведамілі ў Музеі гісторыі горада Мінска.

У экспазіцыі прадставяць больш за 60 жывапісных твораў 1950-1980-х гадоў, пераважна пейзажы і партрэты. "Беларускія далі, блакітныя азёры, бязмежныя палі - гэта галоўныя матывы творчасці Мікалая Валынца. Усе пейзажы аўтара напісаны з натуры, а тэхніка буйнога мазка робіць работы жывымі. Сярод прадстаўленых твораў ёсць таксама пейзажы з відамі Мінска і наваколля: "Мінск, оперны тэатр вечарам", "Вясенні разліў на Свіслачы", "Ждановічы, родныя прасторы", "Мінск, набярэжная Свіслачы", - звярнулі ўвагу ў музеі.

Мікалай Валынец стаў прызнаным майстрам партрэтнага жанру. Ён маляваў вядомых мастакоў і дзеячаў культуры. "У кампазіцыях яго работ няма нязначных дэталей, форма мадэлюецца вельмі пластычна і разам з тым манументальна. У партрэтах праявілася рэдкае майстэрства жывапісца - убачыць душу чалавека і перадаць на палатне яго настрой і характар", - падкрэслілі арганізатары.

На выставе, несумненна, прыцягнуць увагу сямейныя партрэты жонкі, сына, дачок, аўтапартрэты. Тэма Вялікай Айчыннай вайны прадстаўлена партрэтам абаронцы Ленінграда, Героя Савецкага Саюза палкоўніка Віктара Зотава.

У апошнія гады жыцця Мікалая Валынца займала філасофская тэматыка, рэлігія, вобраз Хрыста, ратаванне чалавецтва. На гэту тэму ён стварыў творы, адзін з якіх, "Мары аб зямным раі", прадстаўлены ў экспазіцыі.

"Выстава парадуе наведвальнікаў глыбокім каларытам работ, іх шчырасцю і святлом, любоўю да ўсяго жывога. Экспазіцыю дапоўняць відэаматэрыялы, якія дапамогуць больш глыбока раскрыць не толькі творчасць мастака, але і яго чалавечыя рысы", - упэўнены арганізатары.

Выстава будзе адкрыта да 21 сакавіка.

Мікалай Валынец нарадзіўся ў 1921 годзе, скончыў Віцебскае мастацкае вучылішча, вучыўся ў Льва Лейтмана, Івана Ахрэмчыка. Працаваў у жанрах пейзажа і партрэта, з 1980 года быў членам Беларускага саюза мастакоў, узнагароджаны медалём "За ўклад у выяўленчае мастацтва". Яго работы знаходзяцца ў фондах Беларускага саюза мастакоў, Нацыянальнага мастацкага музея, Магілёўскага абласнога мастацкага музея імя П.В. Масленікава, Нацыянальнага цэнтра сучасных мастацтваў, Слуцкага краязнаўчага музея, а таксама ў прыватных калекцыях і галерэях у Японіі, Грузіі, Чэхіі, Расіі.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі