ДЗЯРЖОРГАНЫДЗЯРЖОРГАНЫ
Флаг Серада, 7 снежня 2022
Мінск -1°C
Усе навіны
Усе навіны
Культура
08 чэрвеня 2022, 10:04

Сімфанічны аркестр БАТД падрыхтаваў для юных слухачоў музычнае падарожжа па Беларусі

Фота з архіва
Фота з архіва

8 чэрвеня, Брэст /Кар. БЕЛТА/. У Брэсцкім акадэмічным тэатры драмы 8 чэрвеня адбудзецца канцэрт-лекцыя для юных слухачоў "Музычны круіз па Беларусі", паведамілі карэспандэнту БЕЛТА ў тэатры.

Незвычайнае музычнае падарожжа для дзяцей і бацькоў падрыхтаваў сімфанічны аркестр БАТД пад кіраўніцтвам дырыжора Аляксандра Куўшыннікава. У праграме - музыка беларускіх кампазітараў XVIII-XIX стагоддзяў і нашых сучаснікаў. Прагучаць творы Станіслава Манюшкі, Яўгена Глебава, брэсцкага кампазітара Васіля Кандрасюка. Таксама слухачоў пазнаёмяць з маладымі талентамі, якія толькі пачынаюць свой шлях у гэтай галіне музычнага мастацтва.

"Так атрымалася, што роўна год таму ў гэты ж дзень, 8 чэрвеня, у нас адбылося першае музычнае падарожжа - у Аўстрыю. У Год гістарычнай памяці мы вырашылі паўтарыць гэты праект і аддаць даніну павагі айчынным кампазітарам, якія стваралі на роднай зямлі. Тым больш што беларуская музыка не які-небудзь маленькі фрагмент, а паўнацэнная музычная мова, паўнацэннае творчае жыццё, якое напаўняла ў свой час канцэртныя залы, салоны, захапляла шмат людзей", - адзначыў аўтар праекта Аляксандр Куўшыннікаў.

Канцэрт-лекцыя таксама прадугледжвае знаёмства з музычнымі інструментамі. Юныя слухачы даведаюцца, чым адрозніваецца флейта-пікала ад звычайнай флейты, туба ад кантрабаса, як гучыць кожны інструмент у складзе аркестра і якую ролю ў ім адыгрывае дырыжор. Музычнае падарожжа абяцае быць не толькі цікавым, але і пазнавальным.

"Наогул гэта музычна-выхаваўчы праект. Сэнс у тым, каб знаёміць дзяцей з акадэмічнай музыкай, прывучаць слухаць яе і разумець. Маладое пакаленне трэба рыхтаваць да ўспрымання сур'ёзнай музыкі, што аказвае глыбокае выхаваўчае ўздзеянне. У гэтым і заключаецца асветная задача праекта. Мы будзем яго развіваць, і, думаю, рады нашых слухачоў будуць павялічвацца", - падзяліўся Аляксандр Куўшыннікаў.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі