18 красавіка, Мінск /Кар. БЕЛТА/. У выставачным комплексе Нацыянальнай бібліятэкі 20 красавіка пройдзе майстар-клас па дэкаратыўна-прыкладным мастацтве, паведамілі БЕЛТА ва ўстанове культуры.
"На майстар-класе наведвальнікі змогуць зрабіць асаблівае велікоднае яйка. Урокі дэкаратыўна-прыкладнога мастацтва дасць кіраўнік народнай студыі дэкаратыўна-прыкладной творчасці "Бусляня" Нацыянальнага цэнтра мастацкай творчасці дзяцей і моладзі майстар народнай творчасці па роспісе яек воскам у тэхніцы "пісанка" Вольга Хачкова", - расказалі ў прэс-службе.
"Велікоднае яйка не толькі эстэтычны элемент святочнага стала, але і вельмі старажытны сакральны сімвал першакрыніцы жыцця і касмаганічнага пачатку. Да яго афарбоўкі заўсёды падыходзілі з поўнай адказнасцю і з улікам векавога эстэтычнага густу. Распісвалі яйкі спецыяльнымі каляровымі фарбамі і маленькімі кручкамі з тонкага дроту, якія акуналі ў расплаўлены воск", - дадалі ў прэс-службе.
Пачатак майстар-класа ў 18.00. Яго наведванне ўваходзіць у кошт наведвання выставы.
Мерапрыемства прадаўжае цыкл майстар-класаў Нацыянальнай бібліятэкі з вядомымі народнымі майстрамі краіны ў рамках выставачнага праекта "Жывыя крыніцы", прымеркаванага да Года гістарычнай памяці.-0-
