25 чэрвеня, Мінск /Кар. БЕЛТА/. Прэм'ерныя паказы спектакля "Сірожа" рэжысёра-пастаноўшчыка Аляксандра Гарцуева адбудуцца ў Рэспубліканскім тэатры беларускай драматургіі 10 і 11 ліпеня, паведаміла БЕЛТА прэс-сакратар тэатра Жанна Гурына.
Аляксандр Гарцуеў вызначыў жанр спектакля як жыццё ў дзвюх эпохах. "Мы раскажам жыццёвыя гісторыі тых, хто мы і сярод каго мы сёння", - адзначыў ён.
"Сірожа" - трэці спектакль у РТБД, створаны паводле п'есы драматурга Юліі Чарняўскай. "Сірожа" - гэта гісторыя пра юнацтва маіх равеснікаў і пра іх сталасць, пра цкаванне і помсту, пра тое, як учынкі людзей, здзейсненыя ў маладосці па глупству, непрыкметна становяцца ніткамі лёсу, а дробязі ткуць непапраўную будучыню, - падкрэсліла аўтар. - І галоўнае, гэта гісторыя пра неабходнасць даравання. Калі вы вырашыце, што я адчуваю нянавісць да галоўнага героя, то памыліцеся. Гэта разуменне таго, чаму ён стаў тым, кім стаў. Гэта спачуванне чалавеку, які загубіў сваё жыццё, даказваючы, што ён не горшы за іншых, - і стаў значна горшым. Гэта шкадаванне аб яго страчанай дабрыні. Я сустракала такіх людзей, як Сірожа, і заўсёды задумвалася, што іх зрабіла такімі. І зразумела - людская пагарда".
Над пастаноўкай працуюць сцэнограф Юрый Саламонаў, мастак па касцюмах Марына Алякно, кампазітар і гукарэжысёр Дзмітрый Фрыга.
У першай эпосе паказваецца 1980-ы год, а другая адлюстроўвае падзеі 2012 года.-0-