28 студзеня, Мінск /Кар. БЕЛТА/. У праекце "Прачулым радком" канал "Культура" Беларускага радыё кожны тыдзень прапануе падборкі паэтычных твораў класікаў айчыннай літаратуры, выдатных творцаў XX і XXI стагоддзяў. Аб гэтым БЕЛТА паведамілі ў прэс-службе Белтэлерадыёкампаніі.
З пачатку новага вяшчальнага сезона на хвалях "Культуры" прагучалі ўжо вершы Янкі Купалы, Максіма Багдановіча, Максіма Танка, Уладзіміра Дубоўкі, а ў бліжэйшы час слухачы змогуць азнаёміцца з паэтычнымі радкамі Петруся Броўкі, Сяргея Грахоўскага, Аркадзя Куляшова, Тодара Кляшторнага, Язэпа Пушчы і іншых аўтараў.
"Гэта своеасаблівая анталогія беларускай паэзіі - ад радкоў заснавальнікаў навейшай літаратуры да паэтычных падборак сучасных творцаў, - адзначыў аўтар праекта, намеснік дырэктара канала "Культура", заслужаны дзеяч культуры Беларусі Навум Гальпяровіч. - Многія паэтычныя радкі вядомыя па шматлікіх публікацыях у кнігах і падручніках, але разам з імі прагучаць і творы, менш знаёмыя шырокаму колу чытачоў. Яны абазначаны высокім майстэрствам, тонкім адчуваннем прыгажосці, кранальным лірызмам".
Праграма "Прачулым радком" выходзіць кожныя суботу і нядзелю. Пераслухаць выпускі можна таксама на сайце радыёканала ў аўдыяархіве перадачы.-0-
