28 мая, Мінск /Кар. БЕЛТА/. У Міністэрстве культуры Беларусі адбылося пасяджэнне камісіі па выяўленні, вяртанні, сумесным выкарыстанні і ўвядзенні ў навуковы і культурны абарот культурных каштоўнасцей, якія знаходзяцца за межамі Беларусі. Аб гэтым БЕЛТА паведамілі ў прэс-службе МЗС.
Пасяджэнне правялі сустаршыні камісіі - намеснік міністра замежных спраў Сяргей Алейнік і намеснік міністра культуры Валерый Грамада.
Намеснік міністра замежных спраў праінфармаваў аб дзейнасці замежных устаноў Беларусі па вяртанні культурных каштоўнасцей, якія знаходзяцца за межамі краіны, і ўнёс прапановы па ўдасканаленні дзейнасці камісіі.
Удзельнікі пасяджэння абмеркавалі праблему перамешчаных з мінскіх музеяў падчас Другой сусветнай вайны культурных каштоўнасцей, якія апынуліся ў іншых краінах, унеслі рэкамендацыі па актывізацыі работы камісіі, у тым ліку па ўстанаўленні ўзаемадзеяння і пашырэнні супрацоўніцтва з замежнымі бібліятэкамі, сховішчамі і музеямі.
Па выніках пасяджэння быў зацверджаны план работы камісіі на бліжэйшыя два гады.-0-
