24 лютага, Мінск /Настасся Архіпава - БЕЛТА/. Фотавыстаўка "Міхайлаўскае. Кабінет Пушкіна" адкрыецца 27 лютага ў Нацыянальным гістарычным музеі Беларусі, паведамілі БЕЛТА ва ўстанове.
Праект праводзіцца сумесна з музеем-запаведнікам імя А.С.Пушкіна "Міхайлаўскае" (Расія). На выстаўцы будуць прадстаўлены работы расійскіх фатографаў Аляксея Лазарава і Мікалая Аляксеева. З дапамогай здымкаў аўтары пакажуць паэтычны настрой Міхайлаўскага ў розны час года і дня.
Наведвальнікі музея змогуць бліжэй пазнаёміцца з унікальным помнікам рускай культуры. Міхайлаўскае, Трыгорскае, Пятроўскае, невялікі пасёлак Святыя (цяпер Пушкінскія), горы са старажытным Святагорскім манастыром - гэтыя мясціны непарыўна звязаны з жыццём і творчасцю Аляксандра Пушкіна. Запаведныя мясціны Пскоўскага рэгіёна прывабліваюць да сябе мастакоў, пісьменнікаў і артыстаў, дзе расцвіў паэтычны талент вялікага паэта.
Фотавыстаўка будзе працаваць па 22 сакавіка.-0-
