7 красавіка, Брэст /Кар. БЕЛТА/. Брэст стане месцам прэм'еры ваенна-гістарычнай драмы "1941. Крылы над Берлінам". Такая інфармацыя размешчана ў Telegram-канале Брэсцкага аблвыканкама, паведамляе карэспандэнт БЕЛТА.
Першы на тэрыторыі краін СНД масавы прагляд расійскага ваеннага фільма пройдзе 27 красавіка ў 18.00 у мемарыяльным комплексе "Брэсцкая крэпасць-герой". Акцыя прымеркавана да Года гістарычнай памяці і 77-й гадавіны Перамогі ў Вялікай Айчыннай вайне.
Ваенна-гістарычны экшэн расказвае пра подзвіг 1-га мінатарпеднага палка ВПС Балтыйскага флоту пад камандаваннем палкоўніка Сямёна Жаваранкава. У жніўні 1941 года лётчыкі палка нанеслі ў адказ нечаканы для ворага бомбавы ўдар па сталіцы фашысцкага рэйха - Берліне. "Мне здаецца, што фільм атрымаўся вельмі моцным. Я спадзяюся, ён знойдзе водгук у сэрцах гледачоў", - падзяліўся выканаўца галоўнай ролі заслужаны артыст Расіі Сяргей Пускепаліс.
На кінапрэм'еры гледачоў чакае сустрэча са здымачнай групай - прадзюсарам і рэжысёрам Канстанцінам Буславым, выканаўцамі галоўных роляў.-0-
