14 сакавіка, Мінск /Кар. БЕЛТА/. У Нацыянальным акадэмічным Вялікім тэатры оперы і балета Беларусі пачаліся рэпетыцыі аперэты Іагана Штрауса "Лятучая мыш", якую ставіць рэжысёр з Венгрыі Міклаш Габар Керэньі. Прэм'ера спектакля запланавана на 16 красавіка, наступныя паказы пройдуць 17 і 18 красавіка. Аб гэтым паведаміла БЕЛТА вядучы рэдактар аддзела інфармацыі тэатра Алена Балабановіч.
"Я шчаслівы зноў звярнуцца да такога цікавага матэрыялу. Мае "Лятучыя мышы" лятаюць на самых розных сцэнах свету: у Зальцбургу, Санкт-Пецярбургу, Празе, Вене, Тэль-Авіве, Бухарэсце, Мюнхене... Але беларуская пастаноўка стане асаблівай. Мы ствараем спектакль, які захавае традыцыі першай аперэты 1874 года, але таксама ўбярэ ў сябе ўсё самае лепшае з таго, што існуе сёння", - адзначыў Міклаш Габар Кераньі, які з'яўляецца мастацкім кіраўніком Будапешцкага тэатра аперэты.
Складаныя лабірынты, паваротны круг, незвычайныя візуальныя эфекты, цікавая харэаграфія - усё будзе працаваць для ажыццяўлення задумы рэжысёра. "І ўсё ж такі ў аснове - музыка. Яна - цудоўная!",- падкрэсліў ён.
Дарэчы, больш за 200 незвычайных убораў для новай пастаноўкі стварае венгерскі мастак па касцюмах Агнеш Ева Дзярмаці, якая працавала ў аскараносным фільме Іштвана Сабо "Мефістофель".
Акрамя Міклаша Габара Керэньі, пастановачную групу ўзначальвае італьянскі маэстра - галоўны запрошаны дырыжор Вялікага тэатра Джанлука Марчана. Над новай пастаноўкай аперэты таксама працуюць сцэнограф Тамаш Ракаі, мастак па святле Петэр Шомфаі, хармайстар Ніна Ламановіч і балетмайстар Вольга Кастэль.
Галоўныя партыі рыхтуюць вядучыя салісты оперы: Настасся Масквіна, Ірына Кучынская, Алена Сіняўская, Алена Таболіч, Марына Ліхашэрст, Клаўдзія Пацёмкіна, Дзіяна Трыфанава, Марына Аксянцова, Васіль Мінгалёў, Аляксандр Краснадубскі, Сяргей Лазарэвіч, Дзяніс Янцэвіч, Аляксандр Міхнюк, Аляксандр Гелах, Андрэй Мацюшонак, Віктар Мендзелеў, Юрый Балоцька, Янаш Нялепа, Дзмітрый Капілаў, Ілья Пеўзнер, Андрэй Сялюцін, Андрэй Кліпо і іншыя.
Цікава, што, як і ў арыгінальнай партытуры, партыю князя Арлоўскага на беларускай сцэне выканае мецца-сапрана - вядучыя салісткі Алена Сало, Крыскенція Стасенка і Кацярына Міхнавец. Арлоўскі выступіць у спектаклі адной з цэнтральных фігур.
Аперэта Іагана Штрауса "Лятучая мыш" у беларускім Вялікім тэатры оперы і балета ўжо ішла ў 1961 годзе. Тады над пастаноўкай працавалі дырыжор Таццяна Каламійцава, рэжысёр Вячаслаў Броўкін, мастак Яўген Чамадураў, хормайстар Аляксей Кагадзееў.-0-
