Праграму да 270-годдзя з дня нараджэння Моцарта прадставяць у Белдзяржфілармоніі
 

7 ліпеня, Мінск /Кар. БЕЛТА/. Дзяржаўны камерны хор Беларусі 9 ліпеня ў Малой зале імя Р.Шырмы Беларускай дзяржаўнай філармоніі прадставіць новую музычную праграму "Шлях да Моцарта", прысвечаную 270-годдзю з дня нараджэння вялікага кампазітара. Аб гэтым БЕЛТА паведамілі ў прэс-службе Белдзяржфілармоніі.

Праект пазнаёміць слухачоў з творчасцю аўтараў, якія фарміравалі музычны густ і стыль юнага Моцарта. "У праграму ўвайшлі пяць хароў Ёзэфа Гайдна, выбраныя хары з кантаты Георга Філіпа Тэлемана "Часы сутак", творы Генрыха Шутца і славуты псалом Антоніа Вівальдзі. Кульмінацыяй вечара стане выкананне "Месы брэвіс фа-мажор" Вольфганга Амадэя Моцарта", - прыводзіць прэс-служба словы мастацкага кіраўніка Дзяржаўнага камернага хору Наталлі Міхайлавай.

Акрамя вакальных твораў, на канцэрце прагучыць інструментальная музыка. "Канцэрт для струнных до-мажор" Тэлемана выканае струнны квартэт пад кіраўніцтвам Аляксея Загорскага. Гледачы таксама пачуюць гучанне раяля і славутага клавесіна Малой залы філармоніі.

У прэс-службе дадалі, што ў пачатку наступнага сезона, 23 верасня, калектыў зноў вернецца да творчасці генія і прадставіць яго "Рэквіем" у Вялікай канцэртнай зале.-0-