Сцяг Чацвер, 28 сакавіка 2024
Усе навіны
Усе навіны
Культура
11 сакавіка 2019, 18:54

Праект "Еўрапейскія гульні - Еўрапейскае мастацтва" аб'яднае выставачную і адукацыйную праграмы

11 сакавіка, Мінск /Кар. БЕЛТА/. Нацыянальны цэнтр сучасных мастацтваў распрацаваў унікальную канцэпцыю міжнароднага выставачнага праекта "Еўрапейскія гульні - еўрапейскае мастацтва", які аб'ядноўвае выставачную і адукацыйную праграмы, паведаміў сёння на прэс-канферэнцыі дырэктар цэнтра Сяргей Крыштаповіч, перадае карэспандэнт БЕЛТА.

"Канцэпцыя сінтэзу спорту і мастацтва стане маштабнай творчай падзеяй. Мастацтва і спорт гістарычна выступалі як аб'яднальная сіла грамадства. Пачынаючы з легендарнага вядомага свяшчэннага перамір'я на час правядзення Алімпійскіх гульняў, якое старажытныя грэкі называлі экехерыя, і заканчваючы шэдэўрамі вялікіх мастакоў. І мастацтва, і спорт змяняюць грамадства і чалавека", - сказаў Сяргей Крыштаповіч.

Прыярытэтнымі задачамі праекта ён назваў папулярызацыю станоўчага іміджу Беларусі на міжнародным узроўні, знаёмства ўдзельнікаў Еўрапейскіх гульняў і гасцей сталіцы з беларускім сучасным мастацтвам, а таксама з апошнімі тэндэнцыямі еўрапейскага мастацтва ў галіне фатаграфіі, плаката і выяўленчага мастацтва, відэа-арту, мультымедыйных праектаў.

Праект "Еўрапейскія гульні - Еўрапейскае мастацтва" стартуе выставай сучаснага айчыннага мастацтва ў рэгіёнах Беларусі ў падтрымку ІІ Еўрапейскіх гульняў па маршруце эстафеты "Полымя міру". У экспазіцыі "Казімір Малевіч і ХХІ стагоддзе" будуць прадстаўлены работы беларускіх мастакоў, якія развіваюць традыцыю і філасофію Малевіча. Выстава "Спорт - гэта высокае мастацтва" з 6 па 30 чэрвеня прадэманструе архіўныя фота і сучасныя фатаграфічныя праекты, плакаты, відэаматэрыялы, скульптурныя аб'екты, дакументацыю перфарматыўных практык, што даследуюць тэму спорту ў шырокім культуралагічным, гістарычным і сацыяльным кантэксце.

"Акрамя таго, у нас будуць працаваць дыскусійныя пляцоўкі, круглыя сталы, лекцыі і майстар-класы. Напрыклад, запланаваны круглы стол "Казімір Малевіч - беларускія вытокі супрэматызму" з прэзентацыяй кнігі прафесара Ігара Малевіча. Мы спадзяёмся, што наш праект "Еўрапейскія гульні - Еўрапейскае мастацтва" будзе па заслугах ацэнены як жыхарамі, так і гасцямі сталіцы", - падкрэсліў Сяргей Крыштаповіч.

Заяўкі на ўдзел у праекце прымаюцца да 22 красавіка, а творчыя работы - да 15 мая.

Арганізатарамі праекта выступаюць Нацыянальны цэнтр сучасных мастацтваў, Беларускі саюз мастакоў і Беларускі саюз дызайнераў пры падтрымцы Міністэрства культуры.-0-

Падпісвайцеся на нас у
Twitter
Топ-навіны
Свежыя навіны Беларусі