Сцяг Аўторак, 19 сакавіка 2024
Усе навіны
Усе навіны
Культура
27 кастрычніка 2022, 10:48

Пра творчасць Мусліма Магамаева раскажуць у Віцебскай абласной філармоніі

27 кастрычніка, Віцебск /Алеся Пушнякова - БЕЛТА/. Чарговым героем цыкла лекцый-канцэртаў "Мастацтва XX стагоддзя ў асобах" праекта Ad libitum, які праводзіцца ў Віцебскай абласной філармоніі, стане вядомы савецкі выканаўца оперы і эстрады Муслім Магамаеў. Аб гэтым карэспандэнту БЕЛТА паведамілі ва ўстанове культуры.

Яго імя гаварылі з прыдыханнем, а яго голас пры жыцці артыста стаў легендай і прадметам зайздрасці. Знакаміты барытон Магамаева гучаў з радыёпрыёмнікаў і з вінілавых пласцінак, білеты на яго канцэрты было не дастаць. Натоўпы паклонніц і мільёны пісем з прызнаннямі ў каханні - перш за ўсё да яго творчасці. "Як толькі Магамаеў з'явіўся, гэта стала з'явай. Ён быў на галаву вышэйшы за ўсіх маладых. Ён усім надзвычайна падабаўся", - так гаварыла пра яго вядомая далёка за межамі Савецкага Саюза спявачка Клаўдзія Шульжэнка.

Муслім Магамаеў нарадзіўся ў 1942 годзе ў сонечным Баку. Яго сям'я была творчай. Бацька-мастак ваяваў на фронце і ўсяго 15 дзён не дажыў да Вялікай Перамогі. Маці будучага пакарыцеля сцэнічных падмосткаў была драматычнай актрысай, а дзед па бацькавай лініі - кампазітарам. Нядзіўна, што ў такой артыстычнай атмасферы ў чорнавалосым прыгажуне з магнетычным поглядам загарэлася іскра вялікага таленту.

Дэбютаваў на сцэне ён у 15 гадоў употай ад родных, якія баяліся, што ў такім раннім узросце яго голас зламаецца. Аднак Муслім Магамаеў рызыкнуў і не прайграў. Усесаюзную вядомасць яму прынёс канцэрт у Крамлі ў 1963 годзе.

Спектаклі з яго ўдзелам ішлі з аншлагам, канцэрты ў Саюзе і за мяжой прыносілі яшчэ больш вядомасці. Аднак пры ўсім гэтым артыст заставаўся на дзіва сціплым чалавекам, адданым сваёй краіне і слухачам.

Артысты Віцебскай абласной філармоніі раскажуць сёння пра творчы і жыццёвы шлях вялікага Магамаева ў 19.00 у малой зале. Творы спевака і кампазітара выканаюць барытоны філармоніі Сяргей Белавусаў, Віктар Янчанка, Аляксандр Якімчук. Гледачы не застануцца абыякавымі і змогуць адкрыць для сябе імя гэтага выдатнага дзеяча, чалавека-эпохі па-новаму.-0-

Падпісвайцеся на нас у
Twitter
Топ-навіны
Свежыя навіны Беларусі