17 студзеня, Мінск /Кар. БЕЛТА/. Супрацоўнікі Нацыянальнага цэнтра сучасных мастацтваў падзяліліся планамі на праекты ў 2024 годзе на прэс-канферэнцыі "Выставачны сезон 2024. Новыя творчыя праекты беларускіх мастакоў", перадае карэспандэнт БЕЛТА.
Так, дырэктар Нацыянальнага цэнтра сучасных мастацтваў Сяргей Крыштаповіч падзяліўся, што першым праектам года стане міжнародны выставачны праект "Сто ўсмешак Гагарына. Усмешка для Свету". "Гэта наш міжнародны праект, які пройдзе сумесна з Міністэрствам культуры і Міністэрствам замежных спраў, паколькі ён прадугледжвае вялікую міратворчую канцэпцыю: сваёй усмешкай і пасылам да свету прадухіліць наспяваючую палітычную напружанасць", - адзначыў ён.
Яшчэ адным міжнародным праектам у НЦСМ стане традыцыйны фестываль тэкстыльнага мастацтва "Тэкстыльны букет". Намеснік дырэктара па творчай рабоце Нацыянальнага цэнтра сучасных мастацтваў Алеся Іназемцава падзялілася, што работа над фарміраваннем экспазіцыі пачалася.
"Фестываль традыцыйна пройдзе ў чэрвені. Мы запрашаем усіх зацікаўленых аматараў і прафесійных мастакоў у галіне тэкстыльнага мастацтва. "Тэкстыльны букет" заўсёды з'яўляўся адкрытым, і яго ўнікальнасць у тым, што ў адной выставачнай прасторы экспазіцыя аб'ядноўвае як мастакоў-прафесіяналаў, так і мастакоў-аматараў. З нядаўняга часу з'явіліся яшчэ і працы дзіцячых арт-студый і школ, якія, як правіла, перадаюць рэгіянальныя нацыянальныя тэкстыльныя тэхнікі. Такім чынам, разнастайнасць тэкстыльных тэхнік і тэхналогій прыцягвае ўвагу ўдзельнікаў практычна з усяго свету. Паступілі ўжо заяўкі з Расіі, Амерыкі і Індыі", - падзялілася яна.
Алеся Іназемцава падзялілася, што НЦСМ таксама плануе падключыцца да святкавання 80-годдзя вызвалення Беларусі ад нямецка-фашысцкіх захопнікаў. "Акрамя нашага выставачнага праекта, які плануецца да адкрыцця ў маі, мы правядзём пленэр маладых мастакоў, па выніках якога адбудзецца выстава работ, а таксама конкурс на стварэнне жывапісных работ. І пленэр, і конкурс будуць прысвечаны 80-годдзю вызвалення Беларусі", - сказала намеснік дырэктара.
Місія НЦСМ, на яе думку, - ствараць і рэалізоўваць не толькі мастацкія праекты, але і тыя праекты,у якіх глядач можа ўбачыць сінтэз розных відаў мастацтва. "Па выніках 2023 года нашы наведвальнікі - маладая публіка ва ўзросце ад 18 да 45 гадоў, якія прыходзяць пераважна за наватарскім, эксперыментальным мастацтвам, за цікавымі і нестандартнымі формамі падачы экспазіцыйнага матэрыялу. І я спадзяюся, што цэнтр застанецца актуальнай пляцоўкай менавіта для маладзёжнага мастацтва", - адзначыла яна.-0-
