10 лютага, Мінск /Кар. БЕЛТА/. Важна захаваць гісторыка-культурную спадчыну краіны. Аб гэтым на пасяджэнні падагульняючай калегіі Міністэрства культуры сказаў намеснік прэм'ер-міністра Ігар Петрышэнка, перадае карэспандэнт БЕЛТА.
"У Год гістарычнай памяці хочацца абазначыць найважнейшую для сферы культуры тэму аховы гісторыка-культурнай спадчыны. Гісторыка-культурная спадчына як канцэнтрацыя і адлюстраванне гістарычнай памяці з'яўляецца асновай фарміравання самасвядомасці беларусаў і дазваляе забяспечыць пераемнасць духоўных каштоўнасцей. На аднаўленне гісторыка-культурных каштоўнасцей штогод выдзяляюцца сродкі з фонду Прэзідэнта Рэспублікі Беларусь па падтрымцы культуры і мастацтва і ў рамках Дзяржаўнай інвестыцыйнай праграмы. Таксама выдзяляюцца сродкі на капітальныя і бягучыя рамонты", - паведаміў Ігар Петрышэнка.
Ён адзначыў, што Міністэрству культуры ў супрацоўніцтве з аблвыканкамамі неабходна вызначыць фронт работ на тых аб'ектах, аднаўленне якіх патрабуе самых тэрміновых рашэнняў.
"Лічу, што Міністэрству культуры разам з аблвыканкамамі неабходна яшчэ раз правесці рэвізію гэтых аб'ектаў, вызначыць аб'ёмы, віды работ і крыніцы фінансавання на аб'ектах, якія патрабуюць прыняцця неадкладных мер. Вызначыце аб'екты, да аднаўлення якіх мы можам прыцягнуць інвестараў, прымайце іншыя меры. Я лічу, што ў Год гістарычнай памяці як ніколі актуальна выпрацаваць сістэмныя рашэнні, якія дазволяць захаваць нашу гістарычную спадчыну і цалкам выкарыстаць патэнцыял аб'ектаў", - падкрэсліў намеснік прэм'ер-міністра.
Ігар Петрышэнка дадаў, што прыняцце рашэнняў аб гісторыка-культурных каштоўнасцях асаблівай катэгорыі знаходзіцца ў паўнамоцтвах абласных выканаўчых камітэтаў і Мінскага гарадскога выканаўчага камітэта.
"У праекце закона Рэспублікі Беларусь, накіраваным на карэкціроўку Кодэкса аб культуры, прадугледжана перадача паўнамоцтваў па прыняцці рашэнняў у адносінах да гісторыка-культурных каштоўнасцей катэгорыі 3 на ўзровень аблвыканкамаў, Мінскага гарвыканкама. Мяркуем, што гэта дазволіць спрасціць прыняцце рашэнняў аб правядзенні рамонтна-рэстаўрацыйных работ на нерухомых матэрыяльных гісторыка-культурных каштоўнасцях і ў пэўнай меры дэбюракратызаваць гэту сферу дзейнасці", - рэзюмаваў намеснік прэм'ер-міністра.-0-
