17 красавіка, Мінск /Кар. БЕЛТА/. Пераможца V Мінскага адкрытага конкурсу харавых і сольных спеваў "Вясновы спеў" назавуць 21 красавіка ў Мінску, паведамілі БЕЛТА арганізатары спаборніцтва.
За час існавання конкурс стаў самым маштабным творчым спаборніцтвам сярод вакалістаў і харавых калектываў, якія праводзяцца ў Беларусі. Традыцыйна ў конкурсе прымаюць удзел звыш 1,5 тыс. выканаўцаў ад 7 да 18 гадоў, якія прадстаўляюць усе напрамкі вакальнага мастацтва - акадэмічны, народны і эстрадны. Праграмы выступленняў салістаў і харавых калектываў уключаюць творы беларускіх кампазітараў, апрацоўкі беларускіх народных песень, а таксама творы сусветнай вакальнай класікі.
З 17 па 19 красавіка на канцэртных пляцоўках арганізатараў творчага спаборніцтва адбудуцца конкурсныя праслухоўванні, на якіх аўтарытэтнае журы вызначыць пераможцаў.
У Мінскім дзяржаўным музычным каледжы імя М.І. Глінкі 20 красавіка адбудзецца семінар-практыкум "Работа з дзіцячым голасам", які арганізуецца для абмену выканальніцкім і педагагічным вопытам. Майстар-класы і прэзентацыі правядуць выдатныя майстры вакальнага і харавога выканальніцтва Беларусі і Расіі.
21 красавіка ў канцэртнай зале "Верхні горад" заключным акордам конкурсу стане цырымонія ўзнагароджання юных лаўрэатаў і дыпламантаў. Галоўная інтрыга заключнага канцэрта - вызначэнне абсалютнага пераможцы творчага спаборніцтва і ўручэнне Гран-пры V Мінскага адкрытага конкурсу харавых і сольных спеваў "Вясновы спеў". З музычным віншаваннем выступяць вядучыя творчыя калектывы і салісты, прызнаныя майстры айчыннай сцэны.
Конкурс арганізаваны ўпраўленнем культуры Мінскага гарадскога выканаўчага камітэта сумесна з Мінскім дзяржаўным музычным каледжам імя М.І. Глінкі, Дзіцячай музычнай школай мастацтваў нумар 1 імя Л.П. Александроўскай і Дзіцячай музычнай школай мастацтваў нумар 17 Мінска.
Партнёрамі конкурсу выступаюць грамадскае аб'яднанне "Беларускі саюз кампазітараў", Беларускі дзяржаўны ўніверсітэт культуры і мастацтваў, Дзяржаўны музычна-педагагічны інстытут імя М.М Іпалітава-Іванава (Расія), навукова-творчае аб'яднанне Facultatis грамадскага аб'яднання "Беларускі саюз музычных дзеячаў".-0-
