2 лістапада, Брэст /Кар. БЕЛТА/. Палескі драматычны тэатр накіруе Нацыянальную тэатральную прэмію на ўмацаванне матэрыяльна-тэхнічнай базы і заахвочванне акцёраў, паведаміў карэспандэнту БЕЛТА дырэктар тэатра Аляксандр Лукашэнка.
Пастаноўка "Вій" у выкананні пінскіх акцёраў стала пераможцам у намінацыі "Лепшы спектакль тэатра драмы для малой сцэны". Асабістую ўзнагароду ў намінацыі "Лепшая работа мастака ў спектаклі тэатра драмы" атрымаў рэжысёр і мастак-пастаноўшчык спектакля Павел Марыніч.
"Вядома, мы задаволены ўдзелам у VI Рэспубліканскім конкурсе тэатральнага мастацтва. Я таксама шчыра рады за Паўла Марыніча. Лічу, што па заслугах яго працу ацанілі, - адзначыў дырэктар тэатра. - Нацыянальная прэмія, акрамя статуэтак і дыпломаў, мае яшчэ і грашовую ўзнагароду. Персанальная прэмія будзе каля 100 базавых велічынь. За спектакль калектыў атрымае 250 базавых. Пэўную частку накіруем на ўмацаванне матэрыяльна-тэхнічнай базы тэатра, частку - на падтрымку работнікаў. Мне вельмі хочацца фінансава падтрымаць акцёраў".
Гэта першая такая ўзнагарода ў скарбоцы Палескага драмтэатра. Хоць намінантам Нацыянальнай тэатральнай прэміі ён станавіўся не раз. Так, у 2016 годзе за пастаноўку "Пінская шляхта" калектыў быў удастоены спецыяльнага прыза "За лепшы спектакль на беларускай мове". Белтэлерадыёкампанія ў якасці падарунка падрыхтавала тэлевізійную версію спектакля.
Цяпер у рабоце ў трупы дзве пастаноўкі. Прэм'ера казкі для дзецей "Па шчупаковым загадзе" запланавана на 14 лістапада. Таксама ідуць рэпетыцыі спектакля для дарослых па дынамічнай і дасціпнай п'есе французскага камедыёграфа Марка Камалеці "Гарнір па-французску". Чакаецца, што сямейную камедыю на сцэне Палескага драмтэатра гледачам прадставяць у другой палавіне лістапада.-0-
