7 лютага, Мінск /Кар. БЕЛТА/. Выстаўка "Чытаем па-беларуску" адкрылася сёння ў Нацыянальнай бібліятэцы Беларусі, паведамілі БЕЛТА ва ўстанове.
"Родная мова - важны сімвал культуры, які нічым не замяніць. Гэта багацце, зберагчы якое - задача кожнага чалавека", - адзначылі ў НББ.
На кніжнай выстаўцы "Чытаем па-беларуску" прадстаўлена айчынная мастацкая літаратура класічных і сучасных аўтараў, а таксама замежная літаратура на беларускай мове.
"Кнігі, прадстаўленыя ў экспазіцыі, можна заказаць праз электронны каталог Нацыянальнай бібліятэкі Беларусі", - паведамілі ў бібліятэцы.
Штогод 21 лютага адзначаецца Міжнародны дзень роднай мовы, галоўная мэта якога - падтрыманне нацыянальных моў і культур, забеспячэнне права кожнага грамадзяніна карыстацца роднай мовай і захаванне моўнай і культурнай разнастайнасці ў свеце.
Выстаўку можна будзе наведаць па 25 лютага.-0-
