24 снежня, Мінск /Кар. БЕЛТА/. Урачыстае мерапрыемства да 60-годдзя бібліяграфічнага бюлетэня "Новыя кнігі: па старонках беларускага друку" адбылося 23 снежня ў Нацыянальнай бібліятэцы, перадае карэспандэнт БЕЛТА.
Штомесячны бібліяграфічны бюлетэнь "Новыя кнігі: па старонках беларускага друку" інфармуе аб новых кнігах беларускіх выдавецтваў, якія паступілі ў фонд Нацыянальнай бібліятэкі, найбольш значных артыкулах з рэспубліканскай перыёдыкі, а таксама рэцэнзіях на беларускія выданні. Дзякуючы ўніверсальнаму зместу, спалучэнню бібліяграфічнай інфармацыі з разнастайнымі аналітычнымі матэрыяламі выданнем цікавяцца чытачы незалежна ад узроўню інфармацыйнай культуры, узросту, адукацыі, прафесійных і асабістых інтарэсаў. Аператыўны выхад у свет, актуальныя і цікавыя беларусазнаўчыя матэрыялы надаюць яму статус каштоўнай крыніцы інфармацыі. "За больш як 14 гадоў работы бібліятэкі ў новым будынку бюлетэнь выдаваўся са сховішча ў чытальную залу 4993 разы, а гэта амаль кожны дзень", - расказалі ў бібліятэцы.
"Бюлетэнь - своеасаблівы бібліяграфічны летапіс нашай краіны. За 60 гадоў надрукавана каля 720 нумароў, па якіх можна вывучаць гісторыю. Стварэнне бюлетэня адбывалася ў той час, калі вялікая ўвага ўдзялялася рэкамендацыйнай бібліяграфіі. У бюлетэні былі раздзелы, якія знаёмілі з новай літаратурай, а таксама той, што знаходзілася ў перспектыве выдання, - адзначыла загадчыца навукова-даследчага аддзела бібліяграфіі Ірына Градаўкіна. - Ужо з першых дзён выданне было запатрабавана бібліятэкамі рэспублікі. У 1990-я гады вялікі ўпор рабіўся на беларусазнаўчым змесце. З'явіўся раздзел "Што чытаць пра Беларусь?", сталі адлюстроўвацца не толькі кнігі, але і артыкулы з часопісаў і газет. Вялікая частка адводзілася фатаграфіям".
У якасці дапаўненняў друкуюцца бібліяграфічныя спісы або агляды, прысвечаныя значным гістарычным падзеям і актуальным пытанням сучаснага развіцця Беларусі, "Беларускі каляндар", а таксама матэрыялы да юбілеяў выдатных дзеячаў краіны, арганізацый і ўстаноў, якія складаюць аснову эканомікі, культуры, навукі і асветы рэспублікі.
Бібліяграфічны бюлетэнь прызначаны для прафесійнай дзейнасці работнікаў бібліятэк, іншых культурных і асветных устаноў, а таксама студэнтам, навучэнцам, усім неабыякавым да гісторыі, культуры і сучаснага жыцця сваёй краіны і тым, хто мае неабходнасць аператыўна атрымліваць патрэбную інфармацыю для павышэння агульнай і прафесійнай адукацыі, самаадукацыі і арганізацыі вольнага часу.
"За 60 гадоў свайго існавання бюлетэнь "Новыя кнігі: па старонках беларускага друку" вырас з рэкамендацыйнага спіса ў вельмі значнае выданне, якое інфармуе чытачоў не толькі аб навінках кнігавыдання, але і знамянальных датах, выдатных людзях нашай краіны, падзеях", - адзначыла дырэктар Нацыянальнай кніжнай палаты Алена Іванова.-0-
