"Дон Кіхот" Людвіга Мінкуса, адзін з самых папулярных класічных балетаў, вяртаецца на сцэну Вялікага тэатра Беларусі ў абноўленым выглядзе. Гэта сёмая пастаноўка названага балета ў гісторыі беларускага тэатра. Тэмпераментныя іспанскія танцы і прыгожую гісторыю двух закаханых у новым прачытанні на сцэне Вялікага можна будзе ўбачыць 24 і 25 сакавіка.
Над прэм'ерным спектаклем працуюць мастацкі кіраўнік Вялікага тэатра народны артыст СССР і Беларусі Валянцін Елізар'еў, заслужаны дзеяч мастацтваў Беларусі Мікалай Калядка, народны мастак Расіі Вячаслаў Окунеў і мастак па святле Ніна Іванкіна.
Паводле слоў Валянціна Елізар'ева, балет "Дон Кіхот" актуальны ва ўсе часы. Народжаны ў 1869 годзе, балет пражыў вельмі багатае жыццё. Розныя гады ў стварэнні яго харэаграфіі прымалі ўдзел такія выдатныя майстры, як Марыус Петыпа, Аляксандр Горскі і Касьян Галяйзоўскі. Гэта класічная спадчына. "Дон Кіхот" - балет пра каханне, яркі і вясёлы, прыносіць шмат радасці, шчасця як выканаўцам, так і публіцы. Таму, я думаю, усе, хто прыйдзе на спектакль, атрымаюць сапраўднае задавальненне", - адзначыў мастацкі кіраўнік Вялікага тэатра.
Папярэдняя пастаноўка "Дон Кіхота", якую таксама ажыццявіў Валянцін Елізар'еў, адбылася на сцэне Вялікага ў 1989 годзе і радавала гледачоў на працягу 34 гадоў. "Для спектакля гэта вельмі вялікі тэрмін. Я думаю, пастаноўка трымалася перш за ўсё дзякуючы добрым выканаўцам. Таксама сама канструкцыя балета вельмі моцная", - адзначыў харэограф.
Ён расказаў, чаму папярэдні спектакль патрабаваў змяненняў. "З цягам часу, на жаль, старэюць дэкарацыі і касцюмы, замыльваецца харэаграфія. Кожны выканаўца нешта паляпшае, не бачачы суцэльнай карціны. Таксама і партыі часам аблягчаюцца. І гэта, увогуле, засмячае спектакль. Наша мэта - абнавіць спектакль, удыхнуць у яго новае жыццё, вярнуць яму віртуознасць. У гэтай пастаноўцы зменена лібрэта, часткова харэаграфія. Я проста вяртаю пастаноўку да тэксту Марыуса Петыпа, Аляксандра Горскага, Касьяна Галяйзоўскага і Валянціна Елізар'ева", - расказаў народны артыст СССР і Беларусі.
Пра актуальнасць спектакля "Дон Кіхот" выказаўся дырыжор Вялікага тэатра Мікалай Калядка. "Балет "Дон Кіхот" адносіцца да залатога фонду класічнага мастацтва. Ён вылучае святло і радасць і робіць незвычайнае ўражанне. Радасць і святло, што ідуць ад спектакля, заўсёды будуць патрэбны гледачу", - адзначыў ён.
Мікалай Калядка, гаворачы пра сваё стаўленне да пастаноўкі, заўважыў, што спектакль павінен жыць, развівацца, расці як дзіця. "Ты яго беражэш, сочыш за ім. Таму я лічу, што спектакль павінен знаходзіцца ў руках аднаго дырыжора, які будзе беражліва захоўваць яго, і кожнаму новаму артысту, кожнаму новаму чалавеку ў аркестры перадаваць гэтыя адносіны і прывіваць традыцыі выканання", - дадаў дырыжор.
У архіве Вялікага тэатра Беларусі захоўваюцца фотаматэрыялы, якія датычацца больш ранніх пастановак "Дон Кіхота". Упершыню балет на музыку Людвіга Мінкуса быў пастаўлены ў 1869 годзе ў Маскве знакамітым балетмайстрам Марыусам Петыпа. У Беларусі ж "Дон Кіхот" упершыню быў пастаўлены ў 1941-м на сцэне Вялікага тэатра. У далейшым спектакль перажыў яшчэ пяць рэдакцый: у 1947, 1952, 1962, 1979 і 1989 гадах. Апошняя пастаноўка ішла да нядаўняга часу, за 34 гады адбылося больш за 160 паказаў спектакля.
Розныя гады ў гэтым балеце бліскуча выступалі такія легендарныя артысты, як Сямён Дрэчын, Тамара Караваева, Аляксандра Нікалаева, Валерый Міронаў і іншыя. На гэты раз галоўныя партыі выканаюць народная артыстка Беларусі Ірына Яромкіна, заслужаныя артысты Беларусі Марына Вежнавец, Людміла Хітрова, Юрый Кавалёў, а таксама Вікторыя Трэнкіна і Таццяна Уласень. Сваё майстэрства пакажуць і зусім маладыя артысты балета Аліна Рудэнка, Дзмітрый Уксуснікаў, Канстанцін Белахвосцік, Аляксандр Місіюк, Дзіяна Багатава, Уладзіслаў Рудэнка і інш.
БЕЛТА.-0-
