26 ліпеня, Мінск /Кар. БЕЛТА/. Нацыянальная бібліятэка перадала 100 выданняў аб Беларусі беларускай дыяспары ў Турцыі і Стамбульскаму універсітэту. Аб гэтым на цырымоніі перадачы паведаміў намеснік генеральнага дырэктара - дырэктар па інфармацыйных рэсурсах і абслугоўванні карыстальнікаў Нацыянальнай бібліятэкі Віктар Пшыбытка, перадае карэспандэнт БЕЛТА.
"Наша бібліятэка падрыхтавала 100 самых цікавых для беларусаў у Ізміры выданняў: падручнікі, дзіцячыя кнігі, руска-беларускія і беларуска-рускія слоўнікі, часопісы пра Беларусь, паштоўкі з акварэлямі беларускіх мастакоў, зборнікі паэзіі беларускіх аўтараў, а таксама турыстычныя і краязнаўчыя альбомы пра Беларусь. Вядома, мы не маглі пакінуць без увагі Стамбульскі ўніверсітэт, і 10 выданняў мы перадаём яму", - расказаў Віктар Пшыбытка.
Паводле яго слоў, Нацыянальную бібліятэку Беларусі і Турцыю звязвае даўняе супрацоўніцтва. "І ў гэтым значную дапамогу нам аказвае пасольства Рэспублікі Беларусь у Турэцкай Рэспубліцы. Упэўнены, што такія мерапрыемствы будуць садзейнічаць культурнаму абмену дзвюх краін і іх узаемаўзбагачэнню", - адзначыў намеснік гендырэктара НББ.
Стамбульскі ўніверсітэт таксама перадаў Нацыянальнай бібліятэцы Беларусі некалькі выданняў з нагоды 100-годдзя ўстановы. "Адна з кніг змяшчае вершы Сулеймана I Кануні - дзясятага султана Асманскай імперыі. Другое выданне - гэта калекцыя мініяцюр і каліграфічных работ, што расказваюць гісторыю іракскага паходу гэтага правіцеля", - паведаміў генеральны консул Рэспублікі Беларусь у Стамбуле Аляксей Швед.
Ён таксама зачытаў пасланне рэктара Стамбульскага ўніверсітэта прафесара Махмута Ака. "Мы стараемся прадстаўляць нашу Беларусь у Стамбуле. У 2019 годзе паміж Нацыянальнай бібліятэкай Беларусі і Стамбульскім універсітэтам было заключана пагадненне аб супрацоўніцтве. Па прычыне развіцця пандэміі яно заставалася на паперы. Але сённяшні абмен падарункамі стане наступным крокам нашага супрацоўніцтва", - падкрэсліў генеральны консул.
Паводле яго слоў, культурнае супрацоўніцтва паміж Беларуссю і Турцыяй развіваецца пазітыўна. Выбудоўваецца цеснае ўзаемадзеянне з беларусамі правінцый Ізміра і Стамбула. "Месяц таму мы правялі кулінарны фестываль у цэнтры Стамбула з удзелам беларускай дыяспары. Мы таксама арганізавалі выставу, прысвечаную 140-годдзю з дня нараджэння Янкі Купалы, у Анкары і Ізміры", - расказаў Аляксей Швед.
Кожны год для беларусаў Ізміра праводзяцца традыцыйныя беларускія Каляды. "Некалькі гадоў таму мы адкрылі ў цэнтры Стамбула Беларускі сквер дружбы. Думаю, мы на правільным шляху, рухаемся ў бок моцнага супрацоўніцтва ў культурным і бібліятэчным аспектах", - рэзюмаваў генеральны консул Рэспублікі Беларусь у Стамбуле.-0-
