5 сакавіка, Мінск /Кар. БЕЛТА/. Вечар памяці Міколы Селешчука адбудзецца сёння ў Нацыянальным гістарычным музеі, паведамілі БЕЛТА ва ўстанове.
Мерапрыемства пройдзе ў час выставы "Успаміны", прысвечанай жыццю і творчасці вядомага беларускага мастака. Успамінамі пра Мікалая Селешчука падзеляцца яго сябры і калегі: мастакі, мастацтвазнаўцы і калекцыянеры. Таксама на мерапрыемстве будзе прадэманстраваны памятны медаль, выпушчаны ў 2018 годзе армейскімі таварышамі Мікалая Селешчука да юбілею сумеснай службы ў воінскай часці нумар 44322 і перададзены імі ў дар музею.
Мікалай Селяшчук нарадзіўся ў 1947 годзе ў вёсцы Велікарыта Маларыцкага раёна Брэсцкай вобласці. Пасля вучобы ў Мінскім мастацкім вучылішчы імя А.Глебава і службы ў арміі паступіў у Беларускі дзяржаўны тэатральна-мастацкі інстытут на аддзяленне графікі (выкладчыкі Пётр Любамудраў, Васіль Шаранговіч). У 1977 годзе прыняты ў Беларускі саюз мастакоў. За серыю графічных работ "Святы" ўдастоены Дзяржаўнай прэміі Беларусі.
Трагічна загінуў у 1996 годзе ў Тырэнскім моры ў час падарожжа па Італіі.
Работы мастака знаходзяцца ў зборах Нацыянальнага мастацкага музея, калекцыі Беларускага саюза мастакоў, карпаратыўнай калекцыі "Пріорбанка", Дзяржаўнай Траццякоўскай галерэі, Галерэі Кастакі ў Афінах, Музеі сучаснага мастацтва ў Нью-Джэрсі (ЗША), а таксама ў прыватных зборах Францыі, Фінляндыі, Канады, Ізраіля, Германіі і іншых краін.-0-
