12 мая, Мінск /Ганна Сініцкая - БЕЛТА/. Беларускі дзяржаўны акадэмічны музычны тэатр рыхтуе прэм'еры спектакляў на восень, паведамілі БЕЛТА ва ўстанове.
"Восенню рэпертуар тэатра папоўніцца новымі спектаклямі. Гледачоў чакае незвычайная прэм'ера - вечар аднаактовых балетаў. Аматары харэаграфічнага мастацтва ў адзін вечар убачаць адразу два балетныя шэдэўры - "Шапэніяна" і "Навелы пра каханне" ("Іспанскі дывертысмент)", - расказалі ў тэатры.
Гісторыя стварэння балета "Шапэніяна" бярэ свой пачатак у далёкім 1907 годзе. Віктар Дандрэ, апякун праслаўленай балерыны Ганны Паўлавай, звярнуўся да балетмайстра Міхаіла Фокіна з просьбай паставіць спектакль. Ён павінен быў быць паказаны на адным з дабрачынных вечароў. Паколькі часу на пастаноўку было няшмат, Міхаіл Фокін вырашыў выбраць для пастаноўкі ўжо напісаную музыку. Яго ўвагу прыцягнула сюіта з рамантычных твораў Фрэдэрыка Шапэна, аркестраваных кампазітарам Аляксандрам Глазуновым. "Балет меў несумненны поспех, а пастаноўшчыкі смела сталі звяртацца да класічнай "не балетнай" музыкі. З лёгкай рукі Міхаіла Фокіна і сёння многія знакамітыя пастаноўшчыкі выбіраюць для рэалізацыі сваіх ідэй ужо вядомыя музычныя творы. У наш час балет "Шапеніяна" захапіў увесь свет і з нязменным поспехам ідзе на многіх праслаўленых сцэнах", - падзяліліся ў тэатры.
Балет "Навелы пра каханне" - зварот да знакамітай пастаноўкі Віяна Гомеса дэ Фансеа Херарда пад назвай "Іспанскія мініяцюры". Гэта своеасаблівая харэаграфічная сюіта, якая складаецца з народных танцаў розных правінцый Іспаніі. Прэм'ера адбылася ў сакавіку 1967 года. Балет меў ашаламляльны поспех, і балетмайстар у адзін вечар стаў знакамітасцю. Пасля гэтага паступілі прапановы аб пастаноўцы балета ў многіх тэатрах былога СССР. Цяперашні зварот тэатра да гэтага матэрыялу - яшчэ адна спроба акунуць гледачоў пры дапамозе мовы танца ў дзіўны свет Іспаніі - краіны, дзе бушуюць страсці і пануе каханне.
Цікавай прэм'ерай стане аперэта "Кароль вальса" на музыку Іагана Штрауса. Дзеянне спектакля адбываецца ў Вене. Новая зорка - спявачка Эльза Вірт з'яўляецца нявестай таленавітага кампазітара Густава Штайна (правобраз Іагана Штрауса). Яе, сярод іншых, вылучае і герцаг Карл Вестфальскі. Ранейшая фаварытка герцага Эдзіт Флавон вырашае ўстараніць саперніцу. "Не хочацца раскрываць інтрыгу гэтай цудоўнай гісторыі, скажам толькі, што яна створана ў лепшых традыцыях жанру, які праславіў Іаган Штраус. Менавіта ён прыўнёс у аперэту тэму сцвярджэння жыцця, асалоды ад яе радасцей, светлую, сонечную лірыку", - адзначылі ў тэатры.
Трагічны фінал гісторыі герояў "Рамэа і Джульета" Уільяма Шэкспіра, здавалася б, не прадугледжвае прадаўжэння. Але творчая фантазія дае неабмежаваныя магчымасці падарожнічаць у часе і нават уваскрашаць сваіх герояў. А як Рамэа і Джульета пражылі б сваё жыццё, калі б засталіся жывымі? Менавіта гэта пытанне задалі сабе вядомыя расійскія тварцы - лібрэтыст Карэн Кавалеран і кампазітар Аркадзь Укупнік. Адказам на пытанне стаў створаны імі мюзікл "Рамэа vs. Джульета. Праз ХХ гадоў". Трупа Беларускага дзяржаўнага акадэмічнага музычнага тэатра пачала падрыхтоўку прэм'еры і прадаставіць свой адказ гледачам ужо гэтай восенню.
Даты паказу прэм'ерных спектакляў і старт продажу білетаў будуць аб'яўлены пазней.-0-
