1 снежня, Мінск /Кар. БЕЛТА/. Міжнародны конкурс піяністаў "Мінск-2021" пачынаецца сёння і пройдзе па 10 снежня. Ужо шосты раз у сталіцы збяруцца лепшыя маладыя выканаўцы з Беларусі, Расіі, Арменіі, Казахстана, Кітая, Узбекістана, Украіны. Аб гэтым карэспандэнту БЕЛТА паведамілі ў Міністэрстве культуры.
"У конкурсе піяністаў прымаюць удзел сольныя выканаўцы на фартэпіяна ва ўзросце ад 16 да 30 гадоў. Чакаюцца праслухванні, якія складаюцца з трох тураў. Першы тур пройдзе з 2 па 4 снежня, а другі 5-6 снежня ў Беларускай дзяржаўнай акадэміі музыкі. Трэці (фінальны) адбудзецца 9 снежня ў Беларускай дзяржаўнай філармоніі", - расказалі ў ведамстве.
Таксама адзначаецца, што ўсе творы ўдзельнікамі будуць выконвацца на памяць. У склад журы конкурсу ўвайшлі педагогі, майстры музычнага мастацтва Беларусі і краін замежжа.
Сёння, 1 снежня, адкрые конкурсную праграму канцэрт у Вялікай зале Беларускай дзяржаўнай філармоніі пры ўдзеле Дзяржаўнага акадэмічнага сімфанічнага аркестра. Дырыжор вечара - народны артыст Беларусі Аляксандр Анісімаў, саліст - народны артыст Беларусі Ігар Алоўнікаў. Пачатак у 19.00.
Вынікі конкурсу будуць падведзены 10 снежня ў Вялікай зале Белдзяржфілармоніі. Праграма прадугледжвае не толькі ўзнагароджанне лаўрэатаў, але і канцэрт з іх удзелам. Пачатак у 19.00.
Арганізатарамі "Мінск-2021" выступае Мінкультуры, Белдзяржфілармонія, БДАМ, а таксама ГА "Беларускі саюз музычных дзеячаў". Конкурс праходзіць пры падтрымцы Мінгарвыканкама.-0-
