19 лістапада, Мінск /Кар. БЕЛТА/. Міжнародны фестываль мастацтваў "Арт-Мінск - 2020" адкрываецца ў Рэспубліканскай мастацкай галерэі Беларускага саюза мастакоў (Палац мастацтва) 19 лістапада ў сталіцы. Аб гэтым журналістам паведаміла першы намеснік старшыні Беларускага саюза мастакоў Наталля Шаранговіч, перадае карэспандэнт БЕЛТА.
Фестываль мастацтваў праводзіцца трэці раз. Ён аб'яднае выставачныя пляцоўкі і культурныя інстытуцыі сталіцы, на месяц ператварыўшы горад у вялікую і яркую галерэю. Наведвальнікі змогуць азнаёміцца з разнастайнасцю мастацкіх напрамкаў у творчасці больш як 400 беларускіх і замежных аўтараў. "Гэта вялікая культурная падзея для нашай краіны. Тут ёсць шмат яркіх, нечаканых работ, якія прымушаюць задумацца. Выстава дапамагае ўключыць успрыманне і ўбачыць новыя тэмы", - падкрэсліла Наталля Шаранговіч.
У час правядзення арт-фестывалю запрошанае журы вызначыць лепшыя работы ў намінацыях "Жывапіс", "Графіка", "Скульптура" і іншых, а таксама ўладальніка Гран-пры. Уручэнне ўзнагарод і дыпломаў адбудзецца ў час закрыцця мастацкага фестывалю.
З 20 лістапада ў мастацкай галерэі "Мастацтва" публіка ўбачыць на экспазіцыі "Краіна Святла" графіку Сяргея Цімохава, а галерэя "Беларт" прадставіць выставу пейзажнага жывапісу "Сузіранне цішыні". У Нацыянальнай бібліятэцы Беларусі 24 лістапада будуць экспанавацца работы праекта "Арт-Мінск - 2020". Акрамя таго, тут жа да 90-годдзя Уладзіміра Караткевіча арганізатары падрыхтавалі літаратурна-мастацкі праект "Княства вобразаў і сноў". Музей сучаснай беларускай скульптуры імя Андрэя Бембеля 26 лістапада прадставіць экспазіцыю станковай скульптуры і графікі Анатоля Арцімовіча "XXI стагоддзе".
Гарадская карцінная галерэя твораў Л.Д.Шчамялёва 25 лістапада пакажа творы I трыенале жывапісу, графікі і скульптуры Vivat Vita. Акрамя фестывальных работ, тут таксама можна азнаёміцца з праектам, прысвечаным нашым сучаснікам народным мастакам Беларусі. "На мой погляд, гэта вельмі правільна. У асноўным гэтыя людзі ўжо ў сталым узросце. На сённяшні момант іх вельмі мала. Такім чынам, мы хочам аддаць даніну нашым патрыярхам, якія стварылі аснову для маладых мастакоў", - адзначыла Наталля Шаранговіч.
"Арт-Мінск" - гэта сумесны праект Цэнтра выяўленчага і мэдыямастацтва "Новая культурная ініцыятыва", Беларускага саюза мастакоў, Палаца мастацтва пры падтрымцы ААТ "Газпрам трансгаз Беларусь".
Наведаць фестываль можна па 16 снежня.-0-
