21 лістапада, Мінск /Уладзімір Мацвееў - БЕЛТА/. Міжнародны камерны аркестр East-West Chamber Orchestra пад кіраўніцтвам вядомага беларускага піяніста і дырыжора Расціслава Крымера напярэдадні канцэрта ў адной з цэнтральных залаў Стамбула быў запрошаны на аўдыенцыю Усяленскім Патрыярхам Варфаламеем. Аб гэтым БЕЛТА паведамілі ў пасольстве Беларусі ў Турцыі.
Патрыярх Варфаламей выказаў удзячнасць сусветна вядомым музыкантам - маэстра і яго аркестру - за іх агульны ўклад у еднасць людзей і народаў з дапамогай музычнага мастацтва. У сваю чаргу Расціслаў Крымер падзякаваў за гонар быць запрошанымі на Фанар і выказаў надзею, што музыка, якая з'яўляецца паслом міру і дабра, будзе і далей аб'ядноўваць народы і канфесіі, садзейнічаць дружбе паміж краінамі і людзьмі.
Потым аркестр выканаў два творы Пятра Чайкоўскага, стаўшы такім чынам першым у гісторыі Канстанцінопальскага Патрыярхата, які быў удастоены права выступіць у яго сценах перад Усяленскім Патрыярхам, мітрапалітамі і епіскапамі.
Сам канцэрт Крымера і яго аркестра ў вялікай зале Стамбула, які адбыўся 20 лістапада, быў прыняты авацыямі стоячы.-0-