1 лютага, Брэст /Кар. БЕЛТА/. Міністэрства культуры зацвердзіла праект зон аховы абарончай казармы "Б-В" сістэмы фартоў Брэсцкай крэпасці. Адпаведная пастанова апублікавана на Нацыянальным прававым інтэрнэт-партале 31 студзеня, паведамляе карэспандэнт БЕЛТА.
Гісторыка-культурная каштоўнасць знаходзіцца ў мікрараёне Дуброўка ў паўночнай частцы абласнога цэнтра і ўваходзіць у склад фартыфікацыйных збудаванняў Брэсцкай крэпасці. Абарончая казарма "Б - В" пабудавана ў 1912-1914 гадах пад кіраўніцтвам старшага вытворцы работ Брэст-Літоўскай крэпасці капітана Д.М. Карбышава і ўяўляе сабой бетонныя пабудовы з тоўстымі сценамі і скляпеннямі.
Праект зон аховы фартыфікацыйнага збудавання распрацаваны спецыялістамі філіяла "Брэстрэстаўрацыяпраект" па заказе ТАА "Нанекс". Дакумент распрацаваны на падставе архіўна-бібліяграфічных і натурных даследаванняў, аналізу горадабудаўнічай сітуацыі і ландшафту. Праектам устаноўлены тэрыторыя гісторыка-культурнай каштоўнасці (на адлегласці 15 м з усіх бакоў будынка) і зоны аховы, умоўныя лініі якой праходзяць за 50 м ад насыпу чыгуначнай веткі ўздоўж праезнай часткі вул. Аўтамабілістаў, зямельных участкаў па вуліцах 2-я Працоўная, 3-я Працоўная і Каменная.
На тэрыторыі ахоўнай зоны забараняецца новае будаўніцтва (акрамя пракладкі неабходных падземных інжынерных камунікацый), нанясенне шкоды і пагаршэнне тэхнічнага стану абарончай казармы, добраўпарадкаванне тэрыторыі без уліку тэматыкі і стылістыкі гісторыка-культурнай каштоўнасці. У зоне аховы ландшафту забараняецца ўзводзіць будынкі і збудаванні, акрамя аднаўлення тых, што існавалі на ёй гістарычна. Таксама тут нельга пракладаць магістральныя дарогі, змяняць існуючы рэльеф і характар ландшафту, праводзіць работы па добраўпарадкаванні і азеляненне тэрыторыі, якія пагоршаць успрыманне фартыфікацыйнага збудавання.
Пастанова Міністэрства культуры аб ахове абарончай казармы "Б - В" сістэмы фартоў Брэсцкай крэпасці ўступіла ў сілу.-0-
