19 красавіка, Мінск /Кар. БЕЛТА/. Міністэрства культуры праводзіць конкурс эскізных праектаў на стварэнне манумента беларускаму пісьменніку Змітраку Бядулі, паведамілі БЕЛТА ў прэс-службе Міністэрства культуры.
Паўдзельнічаць у конкурсе могуць аўтары або аўтарскія калектывы, якія складаюцца са скульптараў і архітэктараў, якія ўжо маюць або атрымліваюць адпаведную прафесійную адукацыю. Заданне для ўдзельнікаў - стварыць партрэтную выяву Змітрака Бядулі на надмагільным мануменце.
Падаць заяўку на ўдзел можна да 27 мая ўключна. Адпраўляць яе трэба на адрас: г. Мінск, пр. Пераможцаў, 11, оф. 718, кантактны тэлефон + 375 17 204 86 05. Матэрыялы ў той жа тэрмін накіраваць на адрас: г. Мінск, вул. Максіма Багдановіча, 13, установа "Дзяржаўны музей гісторыі беларускай літаратуры". З больш падрабязнай інфармацыяй аб умовах можна азнаёміцца на сайце Міністэрства культуры ў раздзеле "Конкурсы".
"Работы па стварэнні надмагільнага манумента Змітраку Бядулі будуць ажыццёўлены за кошт сродкаў рэспубліканскага бюджэту і спонсарскіх сродкаў", - адзначылі ў ведамстве.-0-
