18 лютага, Мінск /Кар. БЕЛТА/. Менавіта з кніг мы пачарпнулі для сябе самыя важныя ідэі і пастулаты ў жыцці, заявіў сёння журналістам першы намеснік кіраўніка Адміністрацыі Прэзідэнта Максім Рыжанкоў у час адкрыцця XXVIII Мінскай кніжнай выстаўкі-кірмашу, перадае карэспандэнт БЕЛТА.
"Для ўсіх нас гэта свята. Мы любім кнігу і менавіта з яе пачарпнулі для сябе самыя важныя ідэі і пастулаты ў жыцці. Рады вітаць сёння тут прадстаўнікоў пасольстваў, якія разам з намі падзяляюць гэта свята. Хочацца сказаць, што наш кніжны фестываль вызначае тое, што за час свайго існавання мы ні разу не перарываліся. Выключэннем не стаў і гэты, даволі напружаны з пункту гледжання пандэміі, год. Мы сабе не маглі дазволіць застацца без свята. З нецярпеннем яго чакалі, каб азнаёміцца са сваімі навінкамі і навінкамі нашых сяброў, а нашым гасцям паказаць, на што здольны выдавецтвы нашай краіны", - адзначыў Максім Рыжанкоў.
Сёння ў адміністрацыйным комплексе па праспекце Пераможцаў, 14 адкрылася XXVIII Мінская кніжная выстаўка-кірмаш. Яна сабрала 281 экспанента з 20 краін. Свае экспазіцыі прадставяць Расія, Казахстан, Іран, Венесуэла, Палесціна, Аўстрыя, Пакістан, Турцыя, Германія. Па просьбах наведвальнікаў у гэтым годзе рэжым работ павялічаны на адну гадзіну: з 10.00 да 20.00, у апошні дзень - да 18.00.
У сувязі з існуючай эпідэміялагічнай абстаноўкай удзельнікам і наведвальнікам выстаўкі рэкамендуецца выконваць масачны рэжым і дыстанцыраванне.
У тэатрах і кінатэатрах, на тэлеканалах у дні работы кірмашу пакажуць фільмы, спектаклі па творах вядомых пісьменнікаў Беларусі і іншых краін. Усе жадаючыя змогуць даехаць да месца правядзення на традыцыйным паэтычным аўтобусе, які будзе курсіраваць ад станцыі метро "Няміга" да выставачнага комплексу на праспекце Пераможцаў, 14, і адначасова пачуць у дарозе творы знакамітых аўтараў. Праезд на ім будзе бясплатным, як і ўваход на сам кніжны форум. Чакаецца, што яго наведаюць амаль 50 тыс. жыхароў і гасцей сталіцы.-0-
