26 чэрвеня, Мінск /Кар. БЕЛТА/. Прэзідэнцкі аркестр Беларусі дасць канцэрт на чыгуначным вакзале ў Мінску, расказаў карэспандэнту БЕЛТА мастацкі кіраўнік і галоўны дырыжор аркестра Віктар Бабарыкін.
"27 чэрвеня мы іграем на чыгуначным вакзале ў Мінску. Гэта будзе бясплатны святочны канцэрт, прымеркаваны да Дня Незалежнасці і 75-й гадавіны вызвалення Беларусі ад нямецка-фашысцкіх захопнікаў, таму сярод гледачоў будуць і ветэраны, - расказаў дырыжор. - Канцэрт пройдзе з 13.00 да 14.00 у зале чакання на трэцім паверсе вакзала. Для пасажыраў, гасцей і жыхароў сталіцы ў выкананні таленавітых музыкантаў нашага аркестра прагучаць творы вядомых кампазітараў і мелодыі песень ваенных гадоў".
Затым, 3 ліпеня, аркестр выступіць у Нясвіжскім замку таксама з праграмай ваенных песень, у якой прымуць удзел заслужаны артыст Беларусі Уладзімір Громаў і народны артыст рэспублікі Уладзімір Пятроў. Цяпер ідзе тур па краіне "Беларусь памятае", аркестр пабываў ужо ў Брэсце, Магілёве, Оршы і Мядзеле. 6 ліпеня адбудзецца фінальны канцэрт туру ў Гродне.
Потым, 9 ліпеня, у Летнім амфітэатры пройдзе канцэрт "Уверцюра да фестывалю: ад класікі да рока", які стане ўступам да Міжнароднага фестывалю мастацтваў "Славянскі базар у Віцебску". "На ім з класікі рока прагучаць
творы групы Metallica, з намі будзе другі саліст групы Deep Purple Джо Лін Цёрнер. Выступяць такія оперныя выканаўцы, як італьянскі тэнар Алесандра Сафіна і салістка Вялікага тэатра Расіі Ксенія Дзяжнёва, вядомая спявачка з Рэспублікі Карэя Сумі Чо і французскі тэнар Венсан Нікло, - анансаваў Віктар Бабарыкін. - Безумоўна, выступяць і беларускія артысты, напрыклад, Іван Вабішчэвіч, Пётр Ялфімаў, Алена Шведава, нашы маладыя выканаўцы. Мы сур'ёзна рыхтуемся да гэтага канцэрта, таму што наша задача - паказаць шырыню фестывалю і яго музычнае багацце". Дарэчы, і ўрачыстае адкрыццё "Славянскага базару" поўнасцю будзе суправаджаць Прэзідэнцкі аркестр.
Калектыў таксама стане ўдзельнікам пятага музычнага фестывалю "Класіка каля ратушы з velcom | A1". 31 жніўня аркестр выступіць на закрыцці форуму. "У нас запланаваны канцэрты да канца года. Так, 20 верасня мы правядзём канцэрт "Музыка савецкага кіно", у час якога прагучыць інструментальная музыка", - адзначыў дырыжор. У праграму ўключаны кампазіцыі са знакамітых савецкіх фільмаў, якія дапамогуць акунуцца ў свет цудоўных, цёплых успамінаў і выдатнай музыкі.
12 кастрычніка рыхтуецца юбілейны канцэрт Беларускага дзяржаўнага ансамбля "Песняры", прысвечаны заснавальніку ансамбля Уладзіміру Мулявіну. 26 лістапада - праграма "Высоцкі. Я, вядома, вярнуся", 30 лістапада - "Класіка сустракае рок", а 14 снежня - "Metallica шоу. Трыб'ют".-0-
