30 сакавіка, Мінск /Кар. БЕЛТА/. Вядучыя артысты беларускага балета і Асацыяцыя зоаабарончых арганізацый падрыхтавалі фотапраект, галоўнымі героямі якога сталі дзікія жывёлы і жывёлы-інваліды, якія маюць патрэбу ў дапамозе, паведамілі БЕЛТА ў Вялікім тэатры.
"Безадказнае стаўленне да жывёл - гэта сур'ёзная праблема. Жорсткае абыходжанне з братамі меншымі, безумоўна, ідзе ў цеснай звязцы з жорсткім стаўленнем да людзей, - лічыць старшыня Асацыяцыі зоаабарончых арганізацый Аксана Давыдзенка. - І аб гэтым трэба расказваць, гэта неабходна тлумачыць. Паколькі гэта вялікая праблема, мы і звярнуліся ў Вялікі тэатр".
Арганізатары доўга думалі над назвай агульнага праекта і спыніліся на такім, як "Мастацтва міласэрнасці". На фатаграфіях паказаны радасныя пацыенты ветэрынарнага ўрача Паўла Жульпы і падапечныя Цэнтра дапамогі птушкам і жывёлам "Пустальга", Цэнтра дапамогі бяздомным жывёлам "Даліна трох кітоў", валанцёры. У фотапраекце паўдзельнічалі многія артысты Беларусі. Аўтар канцэпцыі фотаздымкі - галоўны балетмайстар Вялікага тэатра Беларусі заслужаны артыст Расіі Ігар Колб. Фатограф - Ірына Падольская.
Балерына Лізавета Мусорына расказала, што засталася задаволена ўдзелам у праекце. "У дзяцінстве побач са мной жылі жывёлы-інваліды, я сама іх прыносіла дадому. Галка, якая выпала з гнязда, сабака са спіцай у лапе: ён трапіў у аварыю... Людзі павінны прымаць гэтых цудоўных жывёл такімі, якія яны ёсць. Каб заставацца людзьмі", - упэўнена яна.
На адкрыцці выстаўкі ў фае бельэтажа Вялікага тэатра 30 сакавіка выступяць Ігар Колб, Лізавета Мусорына і прадстаўнікі зоаабарончых арганізацый.-0-
