ДЗЯРЖОРГАНЫДЗЯРЖОРГАНЫ
Флаг Панядзелак, 30 студзеня 2023
Мінск Суцэльная воблачнасць -2°C
Усе навіны
Усе навіны
Культура
03 лістапада 2022, 16:15

Маркевіч: зычнае слова Якуба Коласа гучыць сёння ў многіх краінах свету

Анатоль Маркевіч
Анатоль Маркевіч

3 лістапада, Мінск /Кар. БЕЛТА/. Зычнае слова Якуба Коласа гучыць сёння ў многіх краінах свету. Такое меркаванне на ўрачыстай цырымоніі ўскладання кветак да помніка Якуба Коласа на плошчы яго імя ў Мінску выказаў міністр культуры Анатоль Маркевіч, перадае карэспандэнт БЕЛТА.

"Дзейнасць Якуба Коласа высока ацэнена нашчадкамі, яго імем названы вуліцы, плошчы, школы і бібліятэкі. У сталіцы і на малой радзіме шматлікіх наведвальнікаў сустракаюць музеі. Творчасць Якуба Коласа ўвасоблена ў музычным, тэатральным, кінематаграфічным мастацтве. І сёння зычнае слова класіка гучыць у многіх краінах свету, а яго творы перакладзены на больш чым 40 замежных моў", - сказаў Анатоль Маркевіч.

Ён адзначыў, жыццё народнага паэта стала яркай старонкай у гісторыі беларускай літаратуры. "50 гадоў Канстанцін Міхайлавіч Міцкевіч плённа працаваў на ніве нацыянальнай культуры, паслядоўна і мэтанакіравана змагаўся за адраджэнне свайго краю і аддаў сваё жыццё, каб беларусы ніколі не зведалі таго часу, калі безыменным быў край і народ не ведаў свайго імені. Няхай і далей творы Якуба Коласа натхняюць нас на пабудову моцнай і квітнеючай дзяржавы, расказваюць аб прыгажосці беларускай зямлі", - сказаў міністр культуры.

"Усяго творы народнага песняра, яго знакамітая трылогія "На ростанях", паэмы "Новая зямля", "Сымон-музыка", бессмяротныя вершы, публіцыстычныя звароты да тых, хто адстойваў незалежнасць нашай краіны ў гады Вялікай Айчыннай вайны, - усё гэта грунт жыцця, радасці, стойкасці. Сёння сацыяльныя сеткі выводзяць нас у іншыя прасторы, магчыма, касмічныя, безумоўна, недасяжныя яшчэ дзесяцігоддзі таму. І мне бачыцца, што велічыня такіх мастакоў слова і перш за ўсё народнага песняра Якуба Коласа - гэта трывалая нітачка нашай сувязі ў стагоддзях, у часе, прасторы", - падкрэсліў старшыня Саюза пісьменнікаў Беларусі Аляксандр Карлюкевіч.

"Класікі жывуць вечна ў сваіх творах, і калі мы будзем іх перачытваць, то яны будуць жыць у нашых сэрцах, развіваць інтэлект, дапамагаць развіваць беларускую культуру, нашу родную Беларусь", - дадала дырэктар Дзяржаўнага літаратурна-мемарыяльнага музея Якуба Коласа Ірына Мацяс.

3 лістапада адзначаецца 140-годдзе з дня нараджэння Якуба Коласа. Сёння ў Стоўбцах адкрылі помнік народнаму паэту, выкананы групай беларускіх скульптараў на чале з народным мастаком Беларусі Іванам Міско. У 19.00 у Белдзяржфілармоніі пройдзе святочны канцэрт з удзелам вядучых мастацкіх калектываў і выканаўцаў рэспублікі.

4 лістапада Дзяржаўны літаратурна-мемарыяльны музей Якуба Коласа правядзе XXXVI навуковую канферэнцыю "Каласавіны - 2022", у якой прымуць удзел даследчыкі з розных рэгіёнаў Беларусі. Канферэнцыя пачнецца ў 10.30. У 15.00 у доме-музеі пройдзе ўрачыстае адкрыццё часовай экспазіцыі "Ад усяго сэрца, ад усёй душы: інскрыпты Якуба Коласа на кнігах", а ў 16.00 на святочнай вечарыне "Да сонца Коласам узняцца..." прагучаць вершы і песні на словы Якуба Коласа ў выкананні артыстаў народнага літаратурнага тэатра "Жывое слова".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі