ДЗЯРЖОРГАНЫДЗЯРЖОРГАНЫ
Флаг Панядзелак, 25 кастрычніка 2021
Мінск Ясна +4°C
Усе навіны
Усе навіны
Культура
15 верасня 2021, 15:20

Маркевіч: культура павінна быць фундаментам патрыятызму, праяўленнем незалежнасці і яднання нацыі

Анатоль Маркевіч. Фота з архіва
Анатоль Маркевіч. Фота з архіва

15 верасня, Мінск /Кар. БЕЛТА/. Культура павінна быць фундаментам патрыятызму, праяўленнем незалежнасці і яднання нацыі. Такое меркаванне выказаў сёння міністр культуры Анатоль Маркевіч на пасяджэнні Савета па культурным супрацоўніцтве дзяржаў - удзельніц СНД у Нацыянальнай бібліятэцы Беларусі, перадае карэспандэнт БЕЛТА.

"2021 год аб'яўлены ў Беларусі Годам народнага адзінства. Менавіта ў нацыянальнай культуры і гістарычнай памяці любога народа сканцэнтраваны каласальныя духоўныя багацці, - падкрэсліў Анатоль Маркевіч. - У сучасным свеце культура павінна быць фундаментам патрыятызму, праяўленнем незалежнасці і яднання нацыі, асноваўтваральным элементам дзяржаўнасці".

Як адзначыў міністр, дзяржава ўдзяляе вялікую ўвагу культуры. "Створаны фонд Прэзідэнта Беларусі па падтрымцы культуры і мастацтва, які штогод фінансуе 10 найбольш значных беларускіх праектаў дзяржаўных устаноў, грамадскіх аб'яднанняў і іншых арганізацый рэспублікі, - адзначыў ён. - Адзін з асноўных напрамкаў у дзяржаўнай палітыцы ў сферы культуры, важнейшая задача, без вырашэння якой немагчыма прадставіць будучыню любой дзяржавы, - арганізацыя адукацыйнага працэсу, пераемнасці і бесперапыннасці навучання, пачынаючы ад дзіцячых школ мастацтваў, заканчваючы ВНУ. Усяго ў нашай краіне ў гэтай сістэме функцыянуюць больш за 420 устаноў адукацыі. Навучэнцам прадастаўлены шырокія магчымасці для развіцця іх здольнасцей, рэалізацыі творчых, інтэлектуальных, спартыўных інтарэсаў. На працягу ўсяго творчага шляху таленавіты чалавек мае магчымасць не толькі атрымаць прафесійную адукацыю, але і прадоўжыць удасканальваць свае навыкі і майстэрства пры дапамозе адукацыі пасля ВНУ і павышэння кваліфікацыі".

Паводле яго слоў, важна развіваць фестывальны рух. Сярод найбольш вядомых форумаў - Рэспубліканскі фестываль нацыянальных культур, "Славянскі базар у Віцебску", Рэспубліканскае свята "Купалле" ("Александрыя збірае сяброў"). З 20 па 26 лістапада адбудзецца XXVII Мінскі міжнародны кінафестываль "Лістапад". Акрамя таго, для падтрымкі творчых людзей і ўдасканалення іх навыкаў арганізуюцца розныя конкурсы. Так, з 1 па 10 снежня пройдзе Міжнародны конкурс піяністаў "Мінск-2021".

"У Беларусі наладжана вытворчасць музычных інструментаў - вельмі важнае і значнае для нас пытанне. Створана новае прадпрыемства - "Фабрыка фартэпіяна", прыняты меры па пашырэнні і арганізацыі вытворчасці іншых музычных інструментаў: балалайкі, домры, баяна, гармоні, гітары, цымбалаў", - расказаў міністр.

Анатоль Маркевіч звярнуў увагу на тое, што ў Беларусі штогод папаўняецца Дзяржаўны спіс гісторыка-культурных каштоўнасцей. Сёння ён уключае больш за 5,6 тыс. аб'ектаў. "За апошнія пяць гадоў адрэстаўрыраваны або прыстасаваны пад новыя функцыі больш за 700 помнікаў архітэктуры. Адноўленыя гістарычныя сядзібы і замкі становяцца дзеючымі культурна-этнаграфічнымі комплексамі, выкарыстоўваюцца для культурна-забаўляльнай дзейнасці, арганізацыі турыстычных маршрутаў", - сказаў ён.

"У верасні 2022 года Мінск стане пляцоўкай, дзе краіны СНД змогуць абмяняцца станоўчым вопытам і дасягненнямі ў галіне аховы, папулярызацыі і вывучэння нематэрыяльнай гісторыка-культурнай спадчыны на міжнародным семінары", - дадаў міністр.

Пасяджэнне праходзіць пад старшынствам Беларусі ў СНД. У склад савета ўваходзяць міністры культуры (намеснікі) краін Садружнасці, якія ўдзельнічаюць у анлайн-фармаце. Сёння прысутнічаюць прадстаўнікі Азербайджана, Беларусі, Казахстана, Кыргызстана, Малдовы, Расіі, Туркменістана і Узбекістана. Сярод тэм абмеркавання - культурныя мерапрыемствы на 2021-2025 гады, разгляд плана правядзення ў СНД у 2022 годзе Года народнай творчасці і культурнай спадчыны. Акрамя таго, у парадку дня - экспертная прапрацоўка праекта Канвенцыі аб захаванні аб'ектаў культурнай спадчыны; праект плана мерапрыемстваў па арганізацыі ў 2023 годзе Года рускай мовы як мовы міжнацыянальных стасункаў; міжнародная выстаўка ART EXPO ў 2022 годзе ў Казахстане.

На пасяджэнні падтрымалі ініцыятыву Выканкама СНД рэалізаваць міжнародны праект дзяржаў-удзельніц СНД "Каштоўныя каралі Садружнасці". Мэта - вызначыць і папулярызаваць комплексныя турыстычныя маршруты, якія аб'ядноўваюць знакавыя турыстычныя аб'екты краін Садружнасці з унікальнымі помнікамі гісторыі і культуры, цэнтрамі народных рамёстваў.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі