5 сакавіка, Астравец /Кар. БЕЛТА/. Дзяржава стварае ўмовы для развіцця творчых здольнасцей падрастаючага пакалення. Аб гэтым сказаў сёння міністр культуры Анатоль Маркевіч на адкрыцці новага будынка шматфункцыянальнага комплексу сацыяльна-культурнага прызначэння і творчасці моладзі ў Астраўцы. Аб гэтым БЕЛТА паведамілі ў Міністэрстве культуры.
"Дзяржава стварае ўсе ўмовы для таго, каб таленавітыя беларусы былі вядомыя і запатрабаваныя перш за ўсё на сваёй зямлі. Таму так важна ўзнімаць статус малых гарадоў і вёсак, рабіць іх сапраўднымі культурнымі цэнтрамі, - адзначыў Анатоль Маркевіч. - Шматфункцыянальны сацыяльна-культурны комплекс у Астраўцы цалкам адпавядае гэтым мэтам. Ён будзе служыць на карысць нашым людзям, а галоўнае - дасць магчымасць моладзі раскрыць свой творчы патэнцыял. Не сумняваюся, што гэта падзея яшчэ больш з'яднае людзей у імкненні жыць і працаваць на карысць сваёй Радзімы, у імкненні рэалізоўваць сумесныя праекты, звязаныя з яе развіццём".
Міністр дадаў, што ў Беларусі надаецца вялікая ўвага захаванню спадчыны краіны. Яскравым прыкладам з'яўляецца Гродзенская вобласць, дзе цяпер прадаўжаецца вялікая рэканструкцыя такіх архітэктурных жамчужын, як Стары замак у Гродне, палацава-паркавы комплекс у Свяцку, замкі ў Крэве, Гальшанах і Навагрудку.
Анатоль Маркевіч падзякаваў усім, хто працаваў над стварэннем культурнага цэнтра: Гродзенскаму аблвыканкаму, Астравецкаму райвыканкаму, калектывам Упраўлення капітальнага будаўніцтва Гродзенскага аблвыканкама і ААТ "Гроднапрамбуд". "Шчыры дзякуй і супрацоўнікам культурнай галіны, якія працавалі над змястоўным напаўненнем музейных экспазіцый, бібліятэк, кінатэатра, фарміравалі шматлікія гурткі, стваралі дастойныя ўмовы для творчасці, мастацтва і добрага адпачынку, - сказаў ён. - Жадаю ўсім моцнага здароўя, прафесійных поспехаў і новых здзяйсненняў на карысць нашай роднай Беларусі. А прыгожую палову чалавецтва ад усяго сэрца віншую з надыходзячым Днём жанчын. Будзьце шчаслівыя і любімыя, дарыце нам сваю прыгажосць і выдатны настрой".
Аб'ект узвялі за кошт сродкаў Дзяржаўнай інвестыцыйнай праграмы. Плошча новага будынка на праспекце Энергетыкаў - амаль 10 тыс. кв.м. Тут размесціцца адразу некалькі ўстаноў культуры.-0-