1 сакавіка, Мінск /Кар. БЕЛТА/. Беларускі дзяржаўны акадэмічны музычны тэатр прадставіць 8 і 9 сакавіка прэм'еру спектакля "Гульня кахання", пастаўленую заслужаным артыстам Рэспублікі Татарстан Маратам Башаравым, паведамляе карэспандэнт БЕЛТА.
Гісторыя, якую прадстаўляе тэатр, - п'еса французскага пісьменніка П'ера дэ Марыво, напісаная ў XVIII стагоддзі, пра каханне і пра вечны канфлікт бацькоў і дзяцей. У аснове сюжэта - вядомы камедыйны прыём з пераапрананнем слуг у гаспадароў і наадварот. "Пры выбары п'есы падкупіла тое, што яна ставілася не часта - глядач да канца не будзе ведаць, чым усё завершыцца", - расказаў Марат Башараў.
"Мы спадзяёмся, што глядач будзе здзіўлены. Такіх спектакляў у Беларусі я не бачыў", - прадоўжыў рэжысёр-пастаноўшчык. Да пастаноўкі падрыхтавалі незвычайныя касцюмы, стылізаваныя пад XVIII стагоддзе. П'еса пастаўлена па музыцы і вершах вядомага паэта і кампазітара Юлія Кіма.
Паводле слоў дырыжора-пастаноўшчыка Марыны Траццяковай, музыка ў спектаклі прадаўжае і дапаўняе тэкст п'есы, ствараючы агульную лёгкую і дынамічную карціну. "Мы працуем у гэтым тэатры пад сімфанічны аркестр, і гэта надае спектаклю асаблівае гучанне", - дадаў Марат Башараў.
"У гэтай пастаноўцы мы хацелі захаваць лёгкасць і вытанчанасць, каб глядач на тры гадзіны мог забыць пра ўсё, што робіцца ў нашым жыцці, і выйсці з пачуццём задавальнення", - адзначыў харэограф-пастаноўшчык Андрэй Карх. Паводле яго слоў, творчая група адышла ад класічных норм спектакля - харэаграфію падбіралі пад асаблівасці кожнага персанажа. У спектаклі прысутнічаюць элементы розных танцавальных напрамкаў.
"Спектакль у мяне асацыюецца з амерыканскімі горкамі, таму ты не можаш спрагназаваць наступны крок сюжэта", - выказалася Наталля Глух, якая выканае ролю Сільвіі.
Да гэтага спектакль ставіўся ў Маскве і Нагінску.-0-
