Сцяг Пятніца, 14 чэрвеня 2024
Усе навіны
Усе навіны
Культура
16 мая 2024, 14:29

Маляванку з 1050 кветкамі створаць да юбілею Віцебска

16 мая, Віцебск /Алеся Пушнякова - БЕЛТА/. Палатно даўжынёй 44 метры, складзенае з маляванак з яркімі намаляванымі кветкамі, падрыхтуюць да 1050-годдзя Віцебска, якое адсвяткуюць у канцы чэрвеня. У культурна-гістарычным комплексе "Залатое кальцо горада Віцебска "Дзвіна" карэспандэнту БЕЛТА расказалі, што будзе сімвалізаваць такі падарунак любімаму гораду.

Маляванка з'яўляецца адным з традыцыйных рамёстваў, якія былі распаўсюджаны ў Беларусі з даўніх часоў. Фарбаваныя дываны дарылі на вялікія святы - вяселле, наваселле, і яны станавіліся галоўным упрыгажэннем жылля.

"Віцебск - гэта наш дом, якому мы таксама хочам паднесці ў дар маляванку, прычым не толькі для ўпрыгажэння, але і ў якасці сімвалу дабрабыту, дастатку і абярэгу", - адзначылі ва ўстанове культуры.

На палатне будуць адлюстраваны 1050 кветак - у адпаведнасці з узростам абласнога цэнтра. Фарбы для юбілейнай маляванкі выкарыстоўваюць акрылавыя і фасадныя, якія даўжэй трымаюцца і ўстойлівыя да змен надвор'я. На палотнах будуць намаляваны валошкі, лілеі, рамонкі, цюльпаны. Майстры культурна-гістарычнага комплексу запрашаюць усіх жадаючых - школьнікаў, наведвальнікаў выставак, працоўныя калектывы - да стварэння маляванак. Сваю кветку на палатне ўжо пакінула пара маладых, для якіх удзел у гэтай творчай акцыі да юбілею горада стаў своеасаблівым падарункам да значнай падзеі. Таксама прадстаўнікі Беларускага саюза жанчын з ліку супрацоўніц абласнога ўпраўлення МНС запалілі фарбамі на маляванцы вогненную кветку, якую ні з якой іншай не пераблытаеш. З задавальненнем напаўняюць палотны яркімі малюнкамі людзі з інваліднасцю, якія наведваюць "Залатое кальцо горада Віцебска "Дзвіна".

Фантазію мастакоў-аматараў не абмяжоўваюць звыклымі колерамі, уласцівымі прыродным фарбам адлюстраваных на палотнах раслін. Работнікі культуры заклікаюць прымяняць творчы падыход і размалёўваць, напрыклад, лісцікі, якія абрамляюць маляванку, як дубовыя, дабаўляючы жалуды, або як папараць. Галоўная ўмова - захаванне сіметрыі на адным палатне, каб яно выглядала суцэльным і не выбівалася з агульнай канцэпцыі.

За месяц з пачатку акцыі размалявалі ўжо 16 метраў маляванак, маштабнае палатно завершаць да дня нараджэння Віцебска. На святочных мерапрыемствах яно ўпрыгожыць сквер Маякоўскага за гарадской ратушай, і ўсе, хто прыкладзе руку да яго стварэння, змогуць яшчэ раз паглядзець на свой твор.-0-
Фота Аляксандра Хітрова
Падпісвайцеся на нас у
Twitter
Топ-навіны
Свежыя навіны Беларусі